Bolle de savon/E bonn-e feste a-o Fronte
| ←A canson dell'Orbo | Bolle de savon de E bonn-e feste a-o Fronte |
In morte do roscignêu→ |
Versci zeneixi bûttae zù d'asbrïo,
saeivo quaexi pe dî de strangoggion,
sciammo de pàssoe, se ve mando in gïo,
se ve spalanco, perchè andae, o barcon,
l'é pe däve ûn incarego e ûn comando:
versci zeneixi andae dove ve mando.
Gh'é ûnn-a taera de là da questi monti
dove anchêu sciûscia a tramontann-a scûa:
foîse ûn zoenotto, mi gh'andiae a pê zunti,
ma son vëgio e me tocca fâ procûa;
foîse ûn zoenotto mi gh'andiae a pê nûi
pe portâghe i mae augûri e i mae salûi.
Versci zeneixi, andae sorva Trieste,
sciammo de pàssoe, andaevene in sce Trento,
poi daeghe o bon Natale e e bonn-e feste
e faeghe di frexetti a çento a çento,
e dîghe: scialla! perchè all'anno nêuvo
se spera che a gallinn-a a fasse l'êuvo.
E dî a-i figgiêu de Zena che a famiggia
a l'é orgogliosa de saveili là;
che a l'ha misso dä parte ûnn-a bottiggia
co-a pûa ammûggiâ da çinquant'anni in sà,
pe beivila con lö in t'ûn batti d'êuggio
quando tornian co-a ramma dell'öfêuggio.
Che,... se se desse mai... pe 'nn-a desdiccia....
ma no pensemmo a de malinconie:
tornian tûtti: Tognin, Giêumo, Baciccia…
vêuggio veddile e moae cianze da-o rïe!
ho dito tûtto: andae che mi ho finïo,
versci zeneixi bûttae zù d'asbrio. -
1915.