Bolle de savon/I nostri Santi e i nostri Morti
| ←I sensa teito | Bolle de savon de I nostri Santi e i nostri Morti |
Dove va barca va Baciccia→ |
dall'Isoa do Canton, Ottobre 1919
Sandro, in mëzo a sti monti, e ä calma de sto meize
chinn-o spesso a-o reciammo da mae mûza zeneize;
mûza tûtta nostrâ, che a no se dà de ton,
e mi voentëa ne sento a casaenga canson:
çerto o sò canto o n'é quello do roscignêu....
a canta. a se spascionn-a - meschinn-a! - comme a pêu:
a no l'ha nì ciambrette, nì perle, nì diamanti;
a no l'ha de pissetti, manco a no porta i guanti:
a l'é ûnn-a mûza ä bonn-a, mûza repûbblicann-a,
onesta scinn-a a-o scrupolo, fresca, robûsta e sann-a;
a no l'ha insomma e aje, ni o fä da gran scignöa....
e pe questo a me piaxe, pe questo a me demöa. -
Stamattin, passeggiando chì pe questi sentê
pin de fêugge e de risse, me l'ho trovâ in ti pê.
Vegniva zù, da-e göe di monti, secca, finn-a
a tramontann-a: gianco dappertûtto de brinn-a;
abbrensoïo, me sciûsciava, pe ascadäme, in te dïe,
lê a chêuggeiva in to bosco e castagne tardïe:
lûvega, mucca, scûa comme ûn barcon serrôu,
a no mostra de veddime, a no me dixe bôu:
ä veddeiva, ä sentiva tremmâ sotto a-o gonnello,
e a me se presentava comme ûn indovinello.
Tûtt'assemme a me sbraggia: tra duî giorni l'é i Santi,
fra treì giorni l'é i Morti.... i nostri Morti!... quanti!...
i morti pe l'Italia… Che debito pe-i vivi!
aççendemmo i mocchetti: - sciù che mi canto: - scrivi. -
I emmo visti partî pin de vitta e zoentù…
ëan bûlli... e no-i veddiemo.... no-i veddiemo mai ciù!...
Che bello sangue! o nostro bello sangue italian;
no sangue blêu, ma sangue rosso, chi bogge: - san.
Han lasciôu tûtto; han daeto l'addio - l'ûrtimo addio!
ä sò casa, a-i parenti, ä famiggia, a-o sò nïo.
I emmo visti partî pin de vitta e zoentù...
ëan bûlli... e no-i veddiemo, - no-i veddiemo mai ciù!
Ah, i nostri eroi! - se almeno v'avescimo a Staggen
pe poeive dî cianzendo: - ne sovven!... ne sovven!...
ah, i nostri morti eroi! - se almeno tûtte e scioî
de Zena, da rivëa, poescimo däle a Voî!...
ah, i nostri santi vëi! - che grosso dô de chêu
no poeì vegnî a trovâve portando l'öffisiêu!...
I emmo visti partî pin de vitta e zoentû...
ëan bûlli... e no-i veddiemo.. no-i veddiemo mai ciù!
Ma finchè l'ava a-e scioî l'amê a domandiâ,
finchè e çigae vivian de lûxe e de rozâ,
ma finchè a-o sô de lûggio se fajâ d'öu o gran,
e saa chi mêue pe-a patria portôu in parma de man,
saeì mensonae cantando comme in te litanïe,
e saan i Vostri nommi scriti in sce tûtte e prïe:
tûtti, in te tûtte e case, diëmo de chì in avanti:
Gloria a-i Morti d'Italia, gloria d'Italia a-i Santi! -