Bolle de savon/I sensa teito

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
I sensa teito
[p. 152 modifica]
I sensa teito

al poeta Giulio Tanini

Cäo Tanini, a tò canson
pe chi n'ha casa nì teito,
mi l'ho lètta con pascion,
mi l'ho lètta cö chéu streito.

Ma chi pensa a-i pövei Cristi
che s'incontra in sciö cammin?
ma chi pensa a sti mävisti
dä fortunn-a e da-o destin,

bûttae là - mûggi de strasse -
accoeghae pe-i marciapê,
in scï porteghi, pë ciasse,
sensa letto e sensa oëgê?

Sô de lûggio, sô d'agosto,
ti ti ë o poae di mävestii;
sotto a ûn èrbo, sotto a ûn costo,
fan o cuccio, fan i nii:

ma poi ghe capita addosso
visto e no visto Zenâ
con ûn freido spartilosso,
e no san dove allogiâ.

[p. 153 modifica]

I veddei chì e là che gïan;
no han de sò manco ûn abbaen;
cianzan, bägian e sospïan...
poi s'allungan in sce ûn schaen.

Tramontann-a, aegua e gämisto
i pê giassan, faccia e moen,...
e doman gh'é ûn povio Cristo
da portâ a marçî a Staggen.

A chi a-o cädo in ta so camia
se ne sta ben riparôu,
quande o pensa a quest'infamia
o chêu o cianze ammagonôu.

Ma a mae Zena ch'a l'ha o vanto
do commercio e di dinae,
a l'ha ascì o ciù bello manto,
a l'ha o manto da pietae:

a mae Zena a l'ha o chêu grande,
o chêu grande comme o mâ;
a sò tempo a spende e a spande
sensa fäse coggionâ.

Cäo Tanini, a to canson
pe chi n'ha casa nì teito
mi l'ho lètta con pascion,
mi l'ho lètta cö chêu streito.

[p. 154 modifica]

Comme tì mi caccio ûn crïo
che de Zena o tocchiâ o chêu;
e avian tûtti ûn teito, ûn nïo,
de coverte e di lensêu. -