Bolle de savon/Canson de Natale

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
Canson de Natale
[p. 150 modifica]
Canson de Natale

No sò s'o segge ûn gûsto ûn pö borgheize;
ma o faeto o l'é che quande o calendajo
o dixe: - l'é natale - o bon zeneize
o se cincia e o se gode in te l'inäjo
de stradde, dell'öfêuggio, di banchetti,
e ommi, donne, figgiêu, vëgi, boenetti,

tûtti, sensa eccezion, scordan pe ûnn'öa
o brûtto che in te l'anima s'annïa.
Sto giorno, chi nö fà ûn peccôu de göa?
Eh!... chi é sensa peccôu ch'o cacce a prïa.
Ma scì! da st'oegia, in mëzo a tanta gente,
(tegnimmo e carte ä cëa) nisciûn ghe sente.

E dunque, comme ho dito, pe sta festa,
che in fondo, a l'é ûnn-a festa da famiggia,
doppo tanto gûmmâ, cöse ne resta
de mëgio che attaccâse a ûnn-a bottiggia,
a ûn pandoçe, e treppando co-i figgiêu
levâse quella muffa che s'ha a-o chêu?...

[p. 151 modifica]

Coscì o viandante stanco da-o cammin,
se pe fortûnn-a, o trêuva ûn aerbo, ûn riâ,
o s'assetta, o se pösa ûn pittinin,
pensando ä stradda ch'o l'ha ancon da fâ,
o beive ûn sorso, o manda zù ûn boccon,
e via! pe arrivâ all'ûrtima stazion.

Sto giorno, o serve pe piggiâ respïo,
e preparâse a-e lotte de doman:
trampolin da-o quae ognûn se dà l'asbrïo
pe fä a volata e pe arrivâ lontan,
che in fondo poi vêu dî, futte e prefutte,
buzzarâ tûtti e arrammassâ de mutte.

Natale, seggi sempre o benvegnûo
se ti dae pe ûn momento l'illûxion
che o mondo o vadde avanti in sciö vellûo,
che l'ommo, doppo tûtto, o segge bon,
se ti fae o miacoo che se strenze e moen
comme tra gente che san voeìse ben;

se pe ti in casa, in mëzo a-i nostri cäi
arvimmo e spalanchemmo i nostri chêu,
e cantan i figgiêu comme canäj,
e i pövei vëgi paan tornae figgiêu,
e se all'anima stanca e allûveghia
ti mandi ûn lampo ancon da tò poexìa.