Bolle de savon/Dove va barca va Baciccia

Da Wikivivàgna
Sata a-a navegassion Sata a-a serchia
Bolle de savon de Carlo Malinverni
Dove va barca va Baciccia
[p. 158 modifica]
Dove va barca va Baciccia


Nè lûmmetti, nè fùrgai,
nè sciäti e spari e feste:
ûn fêugo a-o monte: Trento;
ûn fêugo a-o mâ: Trieste.

L'é incontro a questa lûxe
che anchêu i Baciccia van,
mentre o destin o cûxe
a teja pe-o doman.

Coscì, de nêutte, in mëzo
a-o bosco, fà cammin
o viandante ch'o vedde
lunxi brillâ ûn lûmmin.

Bravi, zoenotti! - a rovë
co-i venti a n'ha desdiccia;
bravi, zeneixi! - dove
va barca, va Baciccia.

Giûstamente sûpèrba
Zena a ve ciocca e moen:
remescian sotto l'èrba
i morti de Steggen.

[p. 159 modifica]

L'é o chêu de tûtte e donne
comme ûnn-a bella niccia;
moae, sêu, moggê, galante
gh'àn drento o so Baciccia.

E a lampa, comme in gexa,
ognûnn-a aççeìza a ten….
Mominn-a, Caenn-a, Texa,
scialla! o l'é chì c'o ven.

Che furgai!... che lûmmetti!..
che baxi!... che sospii!...
Fïan torna i mae cocchetti,
e cantan torna i nii.

1916