Berio m.r. II 1.6/O pascio/12
| ←11 | Berio m.r. II 1.6 - O pascio Como li Zuê aprexentà[n] Christe allo pontifico Anna et como san Piero si renegà a Christe. |
13→ |
| transcriçion do Pierenea Goarnê za pubricâ into Giornale Ligustico XX do 1893 tra parentexi quaddre s'azonze e tra parentexi rionde s'esponze, in corscivo e ligatue |
Quando li zue auen cossi preixo, e ligao a christe como de soura e u o cointao, elli si lo menan a caxa de un chi aueiua l anno auanti rezuo lo pouo, ma lantora non lo rezeiua piu. Quando christe fo menao in quella caxa, (e) san piero si intra a quella caxa, e una femena seruiciaira dalla caxa, (e) uisto che aue a san piero si lo aue recognosuo, e incomenza a criar, e a dir, ueramenti e te cognosso, che tu si e delli disipoli de questo homo. Et lantora san piero aue grande paura, e ssi respoxe tuto quanto spauentao, e disse, o femena tu non di ueritai, ni sai zo che tu digi, e partise san piero dalle parole de quella femena de prexente, e lo piu presto che ello poe, e si se ne ze a star allo fogo inperzo che era freido. Quando lo pontifico anna aue uisto christe che li zue l aueiuan preixo, si se lo fe menar dauanti, e ssi ge incomenza a demandar della soa doctrina, e che e questo che tu uai pricando per iudea, e per ieruxalem, e uai preuaricando, et inganando la gente grossa. Et lantora christe si respoxe, fraelo la mia doctrina non n e mea, ma ell e de lo me paire, imperzo che pareixementi e o parlao per lo mondo, e si non n o parlao in ascoxo niente, ma dauanti a ogni gente. Quando christe aue dicte queste parole, lantora si se lassa uno delli serui de quello anna, e ssi leua la man e si de a christe una grandissima mascha per la faza cun grande ira criando adossogi e digando, doncha respondi tu cossi allo pontifico. Et lantora si se uoze christe cun grande humilitai inuer quello chi l aueiua ferio, e ssi ge disse, o frai, se e o mar parlao la mea testimonianza me renda de mal, ma se o ben parlao, per che me ai ferio.