Ro Chittarrin/Risposta de Steva de Franchi à ro paddre Fabriçio Giano

by Steva de Franchi

←Ro paddre Fabriçio Giano à Steva de Franchi

Ro Chittarrin, o sæ strofoggi dra muza de Steva de Franchi Risposta de Steva de Franchi à ro paddre Fabriçio Giano

L'arco e ra corda vœuggio un dì bruxâ→

RISPOSTA

DE STEVA DE FRANCHI
À RO PADDRE
FABRIÇIO GIANO.

SONETTO.

Paddre Giano, me tegno molto bon,
E fin che vivo ve sarò obbligao,
Che in ra lengua Zeneize aggæ piggiao
Gusto à compoñe, voî che sei n'ommon.

Da ra vostra çernua composiçion,
Che lezo, e con ra quæ m'avei lódao,
Comprendo, che sei meistro in primmo grao,
E che posso servîve da garçon.

Ro Pappagallo era zà pronto e lesto
Per fâ verso re Indie un viaggetto:
Voî sei stæto ra caoza dro sò arresto.

Perchè primma d'andâghe, ve prometto
Che vœuggio ch'o tartagge presto presto
De Castellin e dro vostro Sonetto.