Ro Chittarrin/Ra primmaveira
| ←Dialogo tra ra moære e ra figgia | Ro Chittarrin, o sæ strofoggi dra muza de Ra primmaveira à re deliçie de Pegi in caza Lomeliña |
L'estæ→ |
À re Deliçie de Pêgi
IN CAZA LOMELIÑA.
Cantemmo allegramenti,
Scióremose ro cœu.
Sciù via tutti contenti,
Chi sà, chi vœu, chi pœu.
Se sœunnen ri instrumenti,
Che ra saxon ro vœu.
Cantemmo allegramenti,
Scióremose ro cœu.
2
Ven Mazzo à fâ bombæa
Vestío tutto de scioî:
Ra campagna và in æa,
Per tutto manda odoî;
E l'agnellin chi bæa,
Dra taña sciorte fœu.
Cantemmo ec.
3
Se vè ra rondaniña,
Che porta tempo bon:
Bonaçça ra mariña:
Re figge en in barcon:
Minetta con Maxiña
Fan rie l'ortiggiœu.
Cantemmo ec.
4
Ra rœuza l'è pomella,
Ven sciù ro giásemin:
Ro baico e ra giamella
Con ro giaçinto fin.
In questa parte e in quella
Canta ro rosignœu.
Cantemmo ec.
5
À góve ra campagna
À Pégi œuggemmo andâ:
Gh'è prao, bosco, montagna,
Un Pareizo ghe pâ.
In França, in Alemagna,
De ciù vei no se pœu.
Cantemmo ec.
6
Palaçio chi v'incanta,
Tutto spira maestæ:
Ro sito, chi se vanta
D'avei perpetua estæ.
Ogn'érboro, ogni cianta
Ve consola ro cœu.
Cantemmo ec.
7
Int'ro bello boschetto,
Ò pù in mezo dro prao.
Con ro chitarrinetto
D'accordio e ben sœunao,
Se sente netto netto,
L'eco responde vœu.
Cantemmo ec.
8
D'ogni divertimento
Lì gh'è, d'ogni piaxei
Dre cose ghe n'en çento
Da gove, e voî ro sei.
No stemmo ciù un momento,
Andemmo fin d'ancœu.
Cantemmo ec.
9
Da Pégi à Vôtri andemmo,
À Sestri, à Corniggen.
Così se demoremmo,
De vei chi và, chi ven.
Per tutto sentiremmo
Criâ fin ri figgiœu.
Cantemmo ec.
10
Via dunque, Maxinetta,
Andemmo un pò in giandon:
In carroçça ò in barchetta
Passemmo ro magon.
Vegne Manin, Livietta,
Michê, Steva, e Gallœu.
Cantemmo ec.
11
Lì gh'è ra Fregatiña
Polita e ben sparmâ:
A marcia in pavariña,
Ch'a ve pâ uña spozâ,
À quell'aria argentiña,
À quello ventixœu.
Cantemmo ec.
12
Chi ha tempo, e tempo perde,
Non ro rescatta ciù.
Dra zoventù ro verde
Ven frollo, e cazze zù.
Primma ch'o se desperde,
Allegri e de bon cœu
Cantemmo ec.