 |
Questa pagina a no l'è stæta corretta. | |
4
Ra rœuza l'è pomella,
Ven sciù ro giásemin:
Ro baico e ra giamella
Con ro giaçinto fin.
In questa parte e in quella
Canta ro rosignœu.
Cantemmo ec.
5
À góve ra campagna
À Pégi œuggemmo andâ:
Gh'è prao, bosco, montagna,
Un Pareizo ghe pâ.
In França, in Alemagna,
De ciù vei no se pœu.
Cantemmo ec.
6
Palaçio chi v'incanta,
Tutto spira maestæ:
Ro sito, chi se vanta
D'avei perpetua estæ.
Ogn'érboro, ogni cianta
Ve consola ro cœu.
Cantemmo ec.
7
Int'ro bello boschetto,
Ò pù in mezo dro prao.
Con ro chitarrinetto
D'accordio e ben sœunao,
Se sente netto netto,
L'eco responde vœu.
Cantemmo ec.
