Ro Chittarrin/Ra libertæ vendicâ l'anno 1746. à ri 10. Dexembre

Da Wikivivàgna
Sata a-a navegassion Sata a-a serchia
Ro Chittarrin, o sæ strofoggi dra muza de Steva de Franchi
Ra libertæ vendicâ l'anno 1746. à ri 10. Dexembre


[p. 19 modifica]
RA LIBERTÆ
Vendicâ l'anno 1746. à ri 10. Dexembre in ro Duxægo dro Serenissimo
ZANE FRANÇESCO BRIGNOLE SALE.


1
Cantemmo allegramenti,
Viva ra Libertæ,
Sciù via tutti contenti
Corrimmo per Çittæ,
Sœunando ri instrumenti,
Cantando in re contræ,
Viva ra nostra Zena,
Viva ra libertæ!

2
Dro mondo tutto l'oro,
E tutto ro Perù,
Ni quâ se sæ tezoro
No ro stimemmo ciù.
Cantemmo à coro à coro
Allegri e consolæ. Viva ec.

3
Dra guerra ri maranni,
Tutto se pœu soffrî,
Re tempeste, ri danni,
À costo de morî;
Che con l'andâ dri anni
Torna róba e dinæ. Viva ec.

4
Se con dri patimenti
L'avemmo conservâ,
Con dri suoî e stenti
Ra dovemmo guardâ:
Ma sempre ciù contenti
D'éssene affadighæ. Viva ec.

[p. 20 modifica]


5
Dro Duxe, chi governa
Con prudença e savei,
Ne vagghe famma eterna
Donde ro Sô pœu vei.
In lê vive moderna
Ra nostra antighitæ. Viva ec.

6
L'è giusto, l'è clemente,
Degno de comandâ:
L'è savio, l'e prudente;
Quanto se pœu moæ dâ.
In lê son tutte quente
Re degne qualitæ. Viva ec.

7
Viva chi è stæto à parte
Dro dôçe e dro bruxô,
Dro mondo in ogni parte,
Dra nostra Patria ónô.
Che ro sò nomme in carte
Scrito e stampao ghe sæ. Viva ec.

8
In marmaro memoria
E in bronzo dê restâ
De chi con somma gloria
Se fè sacrificâ;
E se ne faççe istoria
À ra futura etæ.Viva ec.

9
Viva ri gentilommi,
Viva ri çittadin,
Viva ogni sorte d'ommi,
E grendi e piccenin,
Tutti ri galantommi
Che s'en adœuveræ! Viva ec.