Ro Chittarrin/Lavate int'ro mê sangue, Amô, re moen

Da Wikivivàgna
Sata a-a navegassion Sata a-a serchia
Ro Chittarrin, o sæ strofoggi dra muza de Steva de Franchi
Lavate int'ro mê sangue, Amô, re moen


[p. 85 modifica]
SONETTO


Lavate int'ro mê sangue, Amô, re moen:
Fammene à pê à cavallo, à ciù no posso:
Suçça, roziggia pù ra porpa e l'osso,
Co uña famme da lôi, raggia da chen.

Int'ro çuffo ra morte zà me ten,
Ni me spaventa ro sâtâ ro fosso.
Ro mâ l'è incancarío, che ciù non posso
À Minetta lasciâ de vórei ben.

Un pò de mâ dra soçça, e ro malanno
Ghe vegne à chi te ciamma Amô benigno:
Mi te ciammerò sempre Amô tiranno:

Amô sença pietæ cruo e maligno,
Che à ro mê cianze quanto longo è l'anno,
Ti me rebatti sciù ro môrro un sghigno.