Ro Chittarrin/Gira in letto da un cò, dall'âtro gira
| ←Sciù ri are, Minetta, d'un sospiro | Ro Chittarrin, o sæ strofoggi dra muza de Gira in letto da un cò, dall'âtro gira |
Lavate int'ro mê sangue, Amô, re moen→ |
Gira in letto da un cò, dall'âtro gira
Tutta ra nœutte sença poei dormî:
Sospirâ, lagrimâ, fâse sentî,
Quanto ra caza d'âto in basso tira.
Appeña ra mattin de luxe spira
Da l'imbâgio dre arve un pò de fî,
Che ciammo, Presto, dæme da vestî:
Passo ra porta, e vaddo via de tira.
E donde? e chi ro sà? vaddo sfogando
Ro dorô chi m'afflizze, e me roziggia.
Così ri giorni mê vaddo passando.
Intanto Amô de mi spaçio se piggia
Con dî: Ti quieteræ; ma sæto quando?
Quando dre fighe l'uga sarà figgia.