Rime diverse in lingua genovese/A Ra Patria dexiro de tornà

Da Wikivivàgna
Sata a-a navegassion Sata a-a serchia
Rime diverse in lingua genovese de Poro Foggetta
A Ra Patria dexiro de tornà
da-e Rime diverse in lingua genovese, Bartoli, Pavia, 1588
cangiòu e u in v e viçeversa
clicca i asterischi pe l'errata corrige
[p. 21 modifica]


A Ra Patria dexiro de tornà
Donde son sempre moe*, se ben son chie,
Ma fin che à no sè netta, e de bugà
Tornà no voggio in carne, e in osse lie,
Anzi se à fosse netta, e ben purgà
Tornaghe ancora n'ardireiva mie
Per puira dri Bandij chi fa guerra
A chi gh'abita, ò, và per Mà, e per Terra.

2.
Che ne và che facemo in villa noi
Paraxi belli, e grendi otra mesura
Con asneixi da Principi, e Segnoi
E dentro, e fuò bellissima impentura?
E che gh'haggiemo sempre frutti, e scioi
E venzemo con l'arte ra Natura
Se goe tanto ben 'li no possemo
Perche da ri Bandij scorsi nui semo?

3.
Van de Bandij inshme* si gran schera
Che non solo vergogna, e danno fan
A i homi dre montagne, e dra Rivera
E à ri strangiè ch'in quelle bande van,
Ma tran ri Citten nostri da promera
Chi aura villezan, perche trà ri fan
Si che se dra Liguria no ri tremo
Fin'à Zena assatè da lo saremo.

[p. 22 modifica]


4.
E in fin mi Paxe no me posso dà
Che stà per lo chiu no possemo in Paxe
Che so che han prezumio d'assata*
Ri boin Meghi Boè fin à ra Paxe,
E s'in goerra à ra Paxe ne fan stà
Pensè cosa faran fuora dra Paxe?
Fa goerra donca à esti Bandij demo
S'in paxe à Zena, e in villa sta voggiemo.

5.
Cosa de di la su ro Poere Andria
Chi non solo ra Patria ha liberaou
Mi ri gren capellazzi cazzaou via
E ra so libertè gh'hà conservaou,
De vei Zena si pigra, e si adormia
Che à no puo chiu goardase ro sò staou,
Da trei descazi chi fan danni mille
E assatan Borghi, non che case, e ville?

6.
L'antiga Zena chi non solo ben
Se goardava le mesma fuora, e chie
Ma tutte re cittè dri crestien
E ro Mà comandava, e terra assie,
Aura per poco Amò dri so citten
Chi per goardara chiu no fan Garie
Dri Turchi, e dri Bandij a l'ha gran poira
E como Zenevrina, Zena fira.

[p. 23 modifica]


7.
E puo che da tutt'homo noi caghè
Aura fa se lasciemo tente offeise
A mi Poro deschiaxe, zuro a Dè,
Che no sacchie parlà sarvo Zeneise,
Che se parla* savesse forestè
Direiva che no son d'esto paeise,
Perche de noi si trista fama mande
Che n'è feto ro loro in mille bande.

8.
Ma spero pue che un di ro chiero sò
Dro nostro Duxe Doria Serenissimo
Con ra virtue dro so gran sprendò
E dro Senato ancora Eccellentissimo,
Deggian spazza* re nuvere d'errò
Dri Bandij chi l'ere fan scurissimo,
Dra terra nostra, e tutto ro contorno
E presto arvine un chiero, e bello giorno.