Rime diverse in lengua zeneise/Andá veggo per Zena a ra marraggia
| ←Za con garie a scorre ri levanti | Rime diverse in lengua zeneise de Andá veggo per Zena a ra marraggia |
A Horatio Paravexin→ |
| acento grave = vocale curta - acento aguçço = vocale longa; clicca o nummero da paggina pe 'n rafronto co-a transcriçion diplomattica |
Andá veggo per Zena a ra marraggia
Zoveni a moen scrolando chiu de cento
Chi han ra forsa si grande, e l'ardimento
Che ardireivan con Marte fá battaggia.
E oura se mangian sott'ri pé ra paggia
E dentre forche spesso feran drento
Ch'han pochi sodi, e manco aviamento
Si ch'è forza arrobá pe ra pittaggia
Ma se garie come avanti armemo
Questi ch'oura scavizzi son chiamé
Chiamá Scipioin noevi se faran.
E Zena como Roma honoreran
E ri vassalli nostri, e ri corsé
Ch'oura ne scorren, tutti scorriremo
Garie donca femo
Ch'aviamento à ri meschin daran
E ro pan con ra spá se guagneran
Ni arrobando anderan
Si che se legni de garie armemo
Da ri legni dre forche ri traremo
E Zena honoreremo,
Perchè l'utile, e honó de questi té
In groria tornerá d'esta citté.