Ra Prefazion
| ←torna a l'endexo | Rimme taggiasche de |
L'antico valore de gli huomini di Taggia→ |
| eddito da E.G. Parodi e G. Rossi into Gior. Stor. Lett. da Lig. - IV, 1903) ↑torna a-a lista di atri scriti |
Agramante Re dri Moori dopo d’avè scorragiao parmo per parmo tutta ra Spagna, tutti chelli monti coscì auti dri Pirinei, e tutta arrèo ra Franza coscì grande co re ciù belle vittorie dro mondo; o se ne passà in te l’Italia aa testa d’in esercito, che o faixeva tremorà tutti fin in tre unge dri pei, con intenzion de mèttira a ferro e a fogo, e fara tutta deventà pezo ch’ina sconscia. — Pensài in poco, com’a po esse andà! Ma coixi vorrei? O no gh’è ancò arrivào che o l’ha pigliao de mira tutto ro Genovesato e in particolà ra Riveira de Ponente.
Xicchè donca stracovai in te Monego da ina grosciscima borrasca de mà, coxi fen? I l’abbottinan asquaixi tutto, che dro restante i ghe portan in po respetto perch’i aveva còita de vegnì a San Remo.
A Vintimiglia, a ra Bordighèa con tutte quante chelle villàtore i no ghe lasciàn manco ciù prea scin prea. Ma coglie! quando i fon in te San Remo, sto Paìse o ghe piaixè; scicchè i ghe mettèn l’urtimo quartè d’inverno.
In giorno Agramante mezo imbriago, descorrendo sto ladron co’ina spia (che d’esti bifforchi o ghe ne serà de longo) o sentì, ch’in po ciù in sciù, o gh’eira in Paìse ben grosso e ricco, come ra marina, e che o ghe faixeva dro vin bon; xicchè o ghe spedì subito tre miria zinquezento Saracin, e o s’i zernè tutti co ri mostazzi negri com’o carbon, perch’i n’accomodasse daa parte de Dio, e ch’i no ghe lasciasse manco ciù d'erba viva.
I vegninse a Taggia; ma i poveri diavi i o pigliàn o faito so; i a gagnàn l’anciòa — Lezèi in po ste tre o quattro ottave, ch’i sentirei de bello, e i virèi quanto onò i s’an daito i nostri antighi varentissimi patriotti, e ciù de tutti Peiro-Zane Benaja e Zan’Antogno Calidon e so frai Zane Vinzenzo.