Poexie do Gioxeppe Peagallo/Pe-o Natale

Da Wikivivàgna
Sâta a-a navegaçión Sâta a-a çèrchia
Poexie de Gioxeppe Peagallo
Pe-o Natale
[p. 49 modifica]
PE-O NATALE
---

Cao Bambinetto dexiderôu,
Ah scialla, scialla, che t'hò trovôu!
L'é ciù d'ûnn'ôa che te çercava
Che sciù pe-i monti m'arrampinava,
E che corriva ben de galoppo
Pe poeì aveì sto bello intoppo;
Corriva in moddo pe-o monte e o cian,
Che m'hò frappôu mezo ûnn-a man.
Ma no fa ninte, no sento dô
Basta che vedde o mæ Segnô.
Ah! Segnô cäo, seì proprio bello!
Ah! mi de véddive no son ciù quello!
Ah! mille mondi me pä de gode,
Vorriæ ëse poeta che faeivo ûnn'ode
Anacrëontica, e vorriæ dî
Cose che faeivan proprio stordî.
Ma za che tanto hò a testa dûa,
E i mæ versetti no fan figûa,
O poeti celebri, vegnïme intorno
In questo insolito e nêuvo giorno,
Vegnï chì tûtti, presto vegnî

[p. 50 modifica]

Ché a-o mæ difetto doveì sûpplî.
Portæve ûn organo, ûn chittarin
Un pianoforte c'ûn amandoin,
E fæve vedde bräi Mûxicanti
Ne-o lödâ o Santo de tûtti i Santi;
Esaltæ a gloria do Figgio Eterno
Che pe scampâne da-o basso inferno
O l'é disceizo in questa tæra
Portando a paxe, levando a guæra,
Non za co-a pompa d'ûn Re, d'ûn Dûcca,
Ma come dixe San Pê, San Lûcca,
Cö bello séguito d'ûnn'ûmiltae,
Che exempio dâvene za no porriæ.
L'é o sò palazio ûn tûgûriotto
Privo de porta e tûtto rotto;
O l'ha pe chinn-a ûn pö de fen,
Poeì accapî s'o dorme ben!
O l'é coverto? oh barbasciûscia!
O piggia o vento quand'o ghe sciûscia ,
Benché sò moæ c'ûn manto vegio
A ghe o ripare ä bellamegio.
Pe compagnia, pöveo figgiêu!
Atro o no vedde che ûn aze e ûn bêu;
Ma se o veddesci, o non ha päo,
Che mòtto d'öu! che tonno cäo!
Che maschettinn-e! che belli êuggin!
Che bello mento! che cavellin!
Ah! se gh'é proprio demuôu natûa
In questa bella rara fattûa;
Ma chi risplende in sciö sò viso.

[p. 51 modifica]

Chi é viva immagine do Paradiso,
Son due pupille lûxenti e belle
Ciù assæ che a lûnn-a, ciù assæ che e stelle.
In faccia a questi quanti ommi gh'en
Son tûtti guersci, tûtti orbixen.
Pittoî famosi, copiælo ûn pö
Se seì capaçi, mi ve paghiö;
Vegnï chì, Apelle, Raffæ d'Urbin,
Rûbens e Giûlio, miæ se seì boin.
Ah chì l'é inûtile l'abilitæ!
So' inimitabili, no ve provæ.
Ma za l'é megio che vadde avanti
Pe no dâ tedio a-i ascoltanti,
Che, se no sbaglio, all'apparensa
Ciù de sentîme non han paziensa;
Chi storçe o collo, chi no m'ammïa,
Chi ciarla insemme, chi se retïa.
Perdingolinn-a! faesci scappâ
A vêuggia a-i fratti de predicâ.
Aoa finiscio, stæ ancö* ûn pö attenti
Ché ve fö poi di complimenti.
Miæ lasciù all'äia quanti Angiolin
Scendan cantando lodi a-o Bambin;
Sentï che cantici, che scinfonie!
Andæve asconde, poeti e poexie,
I vostri versci e cose son
Da cetra angelica a-o paragon?
Cantæ, Angioletti, dunque cantæ,
Voî scì che o spirito ne rallegræ.
Ah che se voësci sempre cantâ

[p. 52 modifica]

Ve sentiæ finn-a sensa mangiâ!
Ma cose gh'ælo? chi ælo che* picca?
Chi ælo chi spuncia? chi me dà a cicca?
Ammiæ ûn pö chie, son tûtte gente,
Chi é de levante, chi é de ponente.
Pastoî, vegnuï* pe adoâ o Bambin,
E sentî o vostro bello voxin.
Mi me ne vaddo, ve cedo o posto,
Ché no me sento de stâ chì a rosto.
Ma deh! lasciæme anc'ûn pittin
Vedde quelli êuggi là do Bambin,
Se lê o m'ammïa solo ûn momento,
Mi me ne vaddo cö chêu contento.