Poexie do Gioxeppe Peagallo/Un Generale e ûnn'Aquila

Da Wikivivàgna
Sata a-a navegassion Sata a-a serchia
Poexie de Gioxeppe Peagallo
Un Generale e ûnn'Aquila

[p. 53 modifica]

Un Generale e ûnn'Aquila


Sûnetto.



L'é sciûscianteçinque anni che pe-a côa
Te tegno, Aquila altera, in te mæ moen;
Ti sæ che non é stæto per demôa,
Se t'hò seguïo ne-i paixi i ciù lonten.
Ti sæ che quando a barbara Scignôa
Da Senna contro a t'attissava i chen,
Con ciù forsa e coraggio appunto allôa
Te difendeiva pe-e montagne e i cien.
Ti hæ perso l'êuggio drito ä testa drita ,
E mi ho piggiôu ûnn-a balla in to çervello
Chi me fa sraxonâ quando raxonn-o;
Sëguime dunque contro all'infinita
Tûrba che per l'Italia a fa o bordello:
Ah che ti ê chêutta e peâ se t'abbandonn-o!
Mi vinso e no perdonn-o,
Mi se con l'ombra tò ti me rinfreschi,
Presto l'Italia a diä : Viva i Tedeschi! —
Coscì criava Radeschi
Vortandose ä tedesca Aquila guersa,
E quella a rispondeiva: Ah che son persa!

[p. 54 modifica]

O mondo o va ä reversa.
Ti n'hæ visto? hò tentôu piggiâ l'asbrïo
Verso o Piemonte, e Alberto o me dà o gïo :
No me riçeive Pio,
Guizot chi me caezava o l'é scappôu,
Luigi Feippo da-o trono o l'é derruôu,
M'han tûtti abbandonôu ! ! !
Unn-a vòtta battendo a forte penna
Piggiava ûn sghêuo terribile da Vienna
E sbalordiva a Senna,
E croviva coll'ombra a gran Germania,
E se a quarche Italian sätava a smania
De sparze da zizzania,
Con quest'ungia per l'äia ö sollevava,
Sotto e nordiche nebbie ö trasportava.
E tûtto terminava.
Aoa l'é cangiôu tempi, o cäo Radeschi,
S'andemmo a questo moddo me stan freschi
Tûtti qnanti i Tedeschi.
Ti me vêu ben,l'é vëo, ma me sovven
Che anche a Marengo ti me voeivi ben.
Eppù da quelli chen
De Françeixi hò piggiôu quella baccâ
Che fin che vivo no a porriö scordâ.
Amigo cäo, me pâ
Che doppo che a ûnn-a testa ho perso ûn êuggio
Ciù no se posse dî: Vêuggio e no vêuggio.
A nave a l'é in t'ûn schêuggio;
Daggo quarche beccâ per l'Ungheria,
In Polonia, in Boemia, in Lombardia,

[p. 55 modifica]

E o becco o se me gïa
Come* s'o fosse de pastetta ò çeia,
L'é inûtile sperâ ne-a primmaveia;
O tempo o l'ë in candeia
In Fransa, in Inghiltæra, dappertûtto,
Solo pe-i campi nordici o l'é brûtto.
No se pêu sperâ aggiûtto
Manco da-o gran colosso de Nicolla:
Ah ti no te n'accorzi? o mondo o scrolla.
Sento c'hò a pansa molla,
No posso batte i äe da-o gran magon:
Damme ûn pittin de sevo ò de rezion,
Ché cazzo in abbandon;
Hò appetito, hò ûnn-a famme chi m'ammassa;
Ti hæ lì do broddo dàmmene ûnn-a cassa.
Ma sitto! sento in ciassa
Unn-a voxe chi crïa: Viva Balilla!
Unn-a lûxe tremenda intorno brilla
Chi me stanca a pûpilla.
Ah semmo persci! andemmose a cacciâ
Tûtti duî co-e gallinn-e in to pollâ.