Piaggio M. - Poesie 1846/Viaggi e Campagnate/Viaggio all'Aja

Da Wikivivàgna
Viaggi e Campagnate de Martin Piaggio
Viaggio all'Aja
(ediçion Pagan - 1846)
[p. 547 modifica]
VIAGGIO ALL'AJA
Olea Romantica

Ecco monto in t’ûn ballon
Per fâ all’aja ûn atro viaggio,
Ma,ho ûnn-a çerta tremaxon
Ch’a no sa guæi de coraggio,
Anzi a spûssa ûn pö de puïa....
Basta, andemmo, a sâ allegrïa:
Mondo, addio che vaddo in Çê
In t’ûn fêuggio de pappê.

Gente caa, che bella vista!
Che vistonn-a anzi mai vista!
Da poeì vedde tûtta ûnïa
Sotto i êuggi a geografia,
E ogni cosa ben scrovî
Senza aveì nisciûn depuî.

Se vedesci cöse pâ
Tûtta a tæra, ûn atro mâ,
I palazzi pän barchette,
E montagne formaggette,

[p. 548 modifica]

E carrosse pän bædin,
E i cavalli pän moscin ;
Ommi e donne indovinelli,
Solo i axi fan figûa,
Perchè andando fan da pûa,
E ragnando pän frenguelli.

Oh per bacco! comme sghêuo
Nell’immensitæ do vêuo!
Figgi cäi, comme caminn-o
Senza aveì nisciûn pe-i pê,
A-i pianeti m’avvixinn-o,
Da chi a ûn pö pertûzo o Çê!

Là gh’è Venere o ciù bello,
Chi Satûrno in te l’anello,
Lazzù Giove, Vesta, Marte,
Chi Mercûjo.... sta dä parte,
No t’ho in tæra conosciûo,
No t’abbordo in Çê segûo.

Quella là con tanta côa
L’ho piggiâ pe ûnn-a Scignöa!
Scappa, scappa, a l’è a Cometa
S’a s’accorze che son poeta,
Che ho l’ardî d’andâ tanto ato,
Me fa fâ o sâto bilato,
A mê sciurbe in t'ûn momento
Convertindome in vapô:
Scialla! ä modda allöa divento.

Lazzù gh’è l’Orza maggiô,
Chi gh’è a Ciossa co-i pollin,
Quello là o l’è o Sagittajo,
E quest’atro o l’è l’Aquajo,
Protettô di Vendi-vin.

[p. 549 modifica]

Là gh’è ûn pä de Bänse giûste,
Ah se e poëse ûn pö portâ
Dove ghe son scarse e frûste!
No ghe saiva miga mâ?

Quelli là son duî Naselli
Sempre freschi, là i Binelli,
Chi gh’è a Vergine co-a Crava,
Lasciù gh’è e braghe do Poin,
Chi o tettin da Madonnava....

Donne cäe, quanto cammin
Ho mai fæto d’assettôu!. ...
O Zodiaco ho zà passôu,
Ma se ho ancon da vedde e stelle,
Ghe lasciö vista e parpelle,
Che a contâle per menûo
Ghe vêu ûn secolo segûo.

L’è ciù megio che adaxetto
Torno a-o mondo cö ballon,
Me proviö a trovâ o segretto
De poeì dâghe a direzion
Che se çerca orizzontale,
Diventiö coscì immortale.

Ma com’æla?.... là a Levante
Se gh’è fæto coscì brûtto!
Spunta a Lûnn-a c’ûn tûrbante
Pin de fêugo da per tûtto,
A l’ha averto i magazzin
Da gragnêua, di lampi e troîn!....
Scappa scappa, andiö a Ponente.

Ma là ûn sciäto se ghe sente,
E gh’è all’aja çerte striscie
Con treì coî che me pän biscie,

[p. 550 modifica]

Ghe bæxinn-a pesci chen,
E ghe scciôisce i oraghen!
Scappa, scappa, e dove andiö?
Da che banda mai passiö?....

Pe andâ verso Tramontann-a
Ghe vorriæ ûn ballon de lann-a
E fodrôu de sagorrà,
Con mi drento ben serrôu,
De cotton tûtto fasciôu,
E imbottïo de sciacchetrà,
Perchè là ghe[sic] i zeffiretti
Che fan diventâ sciurbetti.

Dunque a Zena fö ritorno ,
E passiö da Mëzogiorno,
Là gh’è sempre aomanco sen:
O che bello arco balen
Che me veddo sotto i pê,
Tûtto intrego a contro-çê!

E che bella antighitæ
C’ho scoverto a êuggi serræ!
Antiquai, vegnî avanti,
Che ve sfiddo tûtti quanti
A trovâne ûnn-a ciù antiga,
E ciù bella e caa da mæ
Senza speiza, nè fadiga:
Oh beneita antighitæ!
Che persuade appenn-a vista,
Senza stâghe a perde a vista,
Nè con lenti o microscopj,
Canocciali, o telescopj,
Senza tanto andâ a çercâ
Dov’a l’ea, chi l’ha trovâ;

[p. 551 modifica]

Quest’a l’è ûn’antighitæ
Bonn-a pe-i ricchi e pe-i despeæ.

Antiquaj deliranti,
Che ve a digghe?.... fæve avanti,
No.... stûdiæghe un momentin,
Che ve a diö da chi a ûn pittin.

Primma vêuggio ûn pö pensâ
A dirizze o mæ ballon;
Ma n’ho remmi, nè timon,
Manco veje.... e comme fâ?....

Ah, se foîse ûn pescio, ûn’oca,
Unn-a ræna, ûnn-a farfalla....
O se avesse qualche poca
Cognizion.... ma zitto!.... scialla!....
Finalmente l’ho trovâ!....
Aggiûttæme ûn pö a sciûsciâ
In to pægua, ch’o fa veja....
S’inscia a sæa megio che a teja....
Comme remmo fito, e ben,
Senza remme, co-e mæ moen!.........
Comme cöro ben!.... mâ boâ!
Vaddo pezo che Le-Roâ.....
No me manca che o timon
Pe asseguâme a direzion......
Zitto!.... sciallâ!.... atra risorsa,
Per timon gh’applico a borsa,
E a perûcca per l’agiaxo....
Gran scoverta fæta a caxo!....
Aoa scì che son contento,
Son padron dell’elemento,
Vaddo e vegno dove vêuggio,
Senza puïa d’intoppâ schêuggio,

[p. 552 modifica]

Se qualcûn no se o vêu credde,
Ch’o ghe vegne presto a vedde.

Gran scoverta c’ho mai fæto!
Che me a negan?.... barbasciûscia!
Ma ohimè mi!.... cose gh’è stæto!
Un gran vento forte sciûscia!....
Comme tronn-a da lontan!....
Incomença a dilûviâ ...
Che gragnuetta in primma man!
Ah! divento in fracassâ....
Quanti sguari ha zà o ballon!......
Vatt’a fâ leze o timon!
O va all’aja co-a perûcca!
Ah che perdo e staffe e a sûcca!
Da chi a ûn pö me picca addosso
Qualche sæta spartilosso!....
Donne cäe, piggiæme in brasso,
Che a figûa d’Icaro fasso,
E divento ûn aereolita....
A scoverta a l’è zà frita.
Ah che l’aja a non è o mâ!
Gh’è cattivo navegâ,
Nè se pêu trovâ a-o ballon
Unn-a giûsta direzion,
Perchè in barca s’è sorv’ægua,
Ne-o ballon, comme sott’ægua.
Se ne sciorto, e salvo a pelle,
Mai ciù vaddo a frusciâ e stelle,
Ma stö in tæra in to mæ nïo....
Zitto, zitto.... ahimè! respïo,
Cessa l'ægua ... se fa sën,
Lûxe o Sô! scrêuvo terren,

[p. 553 modifica]

Ah se poëse vedde Zena!....
A l’è là, sciallâ manena!
Da-o piaxeì mê batte o coêu,
A conoscio da lontan,
Che ho l’ annasto comme o can,
Dall’odô che fa i Raviêu:
Dove vaddo a dâghe fondo,
Che l’è megio ëse in t’ûn tondo
De raviêu c’ûn tocco bon,
Che per l’aja in t’ûn ballon....

Antiquai, cose ne dî?....
Ma a propoxito vegnî,
Che ve leve a cûxitæ
Da preziosa antighitæ
Che ho trovôu, comme v’ho dito
Miæla a êuggi streiti e fito,
Poi me dieì se ho fæto errô,
Eivea là, mincioîn, ne-o Sô.