Piaggio M. - Poesie 1846/Viaggi e Campagnate/Seguito da campagnata
| ←Campagnata in Rûa | Poexie de Seguito da Campagnata |
Ritorno da Rûa→ |
| (ediçion Pagan - 1846) |
Me ne son andæto a pê
(Comme ho dito in l’atro fêuggio)
Raccontâ chi no ve vêuggio
I mïoîn de puntapê
Che piggiavo man per man;
Quante votte son scûggiôu
Pe-o terren tûtto bagnôu,
Che all’odô do rosto ûn Can
O m’ha e stacche roziggiôu;
Che ûnn-a Vacca in to passâ
A m’ha tiôu ûnn-a cornâ,
E son cheito in t’ûn spinon,
Che me son tûtto frixôu;
E che ûn Aze grande e grosso,
Ciù che mi, per attrazion,
O me voeiva vegnî addosso,
E o m’ha dæto ûnn-a dentâ,
Che ne porto i segni ancon...
Manco vêuggio chì contâ
A gran puïa che m’ho trovôu
Pe ûn vestïo da Pellegrin
C’ûnn-a faccia da assascin,
Che caitæ o m’ha domandôu,
E gh’ho dæto quanto aveivo
Pe ûn steccon che ghe veddeivo,
Chi m’ha fæto ûn pö ghignon!...
Tûtte cose vertadee,
Che a contâle no pän vee,
E che a mi successe son,
Ma vegnimmo ä conclûxion.
Stanco, frûsto, dizossôu,
Posso dî, per miäcoo, vivo
Finalmente poi gh’arrivo
A-o Pertûzo dexideôu!
(Chi me fesse serrâ o coêu.)
M’aspëtava o Sciö Grighêu.
Co-a so bella Compagnia
Anscietosi pe-o mæ arrivo....
Che me fen festa e allegria,
Criando: evviva! Scignorïa!
Me rallegro!.. Sciä è ancon vivo?...
Co Cò-cò - Cà-cà - Cariscimo...
Grazie! grazie! rispondeivo;
Obbligato — obbligatiscimo;
Ma ciù rëze no me poeivo.
In spalletta me piggiòn,
Me sguarròn mëza a marscinn-a,
Comme in trionfo me portòn
Drito drito ne-a Cuxinn-a
Do Locale da Pappata,
M’imboccòn ûnn-a broddata
Tanto cäda chi m’ha peôu,
Ma a m’ha ûn pö refucillôu.
O Padron de sto Locale
O l'ëa ûn atro originale
De Cabirda, senza denti,
Tûtto pin de complimenti,
Che o parlava sempre lê,
C’ûnn-a perrûcchetta möa
Co-i scciûppetti de pappê,
E... ûn Filosofon ciantôu,
Giûdicâlo poeì dä töa
Che o n’aveiva preparôu
In to mëzo da cuxinn-a
Co-a tovaggia ä Cappûçinn-a,
Tondi neigri scamuræ,
Con de fêuggie per toaggiêu,
Gotti verdi, fiaschi blêu,
E posate in legno ûzæ!
De pennacche per cottelli,
Per carëghe di scambelli
Per creddenza ûnn-a pötronn-a;
Ma!...o gh’aveiva a Chêuga bonn-a,
Che a l’aveiva rimediôu
(Grazie ä so Filosofia)
A-e provviste andæte via
Con Cappoîn, do gran Stûffôu
E ûnn-a bella Lasagnata
Co-a spûssetta, pe-a Brigata
Impaziente d’andâ a töa.
Rincresceiva ä Sciä Leonöa
E ä Poetessa de disnâ
In campagna da ûn fugoâ!
Ghe ven coæ de fâ a mozion
(A giornâ essendo coverta)
De disnâ ûn pö all’aja averta
Per rescioâse o coêu e o pulmon.
Brave! tûtti gh’applaudìn,
E se destinò o Giardin
Dä Cuxinn-a ûn pö lontan,
Dove gh’ëa per guardia ûn Can,
Chi no fava che bajâ,
E o me dava da pensâ.
Ommi e donne in procescion
Ogni cosa là portòn,
Destendendola per tæra
In t’ûn campo de crescion
A-o Bivac comme in guæra.
Chi mangiava d’assettôu,
Chi d’in pê, chi d’in gatton;
Mi me gh’ëo mëzo accoegôu
E m’andavo pittûssando
Qualcösetta e recillando
D’osservâ in accampamento
Quello bello assortimento
De famosi Combattenti,
Armæ tûtti de boîn denti,
Devastando, annichilando
Quanto ghe cazzeiva sotto:
Oh che stragi se façeiva!
Sccioiva sangue da ogni gotto
Che coraggio o gh’infondeiva,
E da Eroi se combatteiva.
E Madamme no bûrlavan
Manco lö, che intrepidiscime
Se batteivan comme Amazzoni
E a vittoria contrastavan
Con belliscime difeize...
Ma lascemmo stâ e metafore;
E parlando in bon Zeneize,
Se l’impivan, s’imbriægavan,
Se godivan, se cinciavan,
E.... veddeivo d’arescoso
Che o Sposôu vegniva giöso,
Ve o creddiesci? do Filosofo;
Che Leonöa va in irascimini
Con Grighêu pe-a Mûza decima,
Che o Dottô stûdiava o Bartolo
Co-a Bellezza tarantellica,
Che co-i Baffi a Petronillica
A piggiava a so revincita,
E o Cò-cò - Cà-cà - Cariscimo
Trastullavasi allegriscimo
Or con questa, ed or con quello...
Cose voeì? in to ciù bello
Ven ûn lampo chi inorbisce,
Ûnn-a sæta chi insordisce,
E se mette tutt’assemme,
Non a ciêuve, a dilûviâ,
Che bezêugna disertâ
E lasciâghe o ciù chi premme....
Scappa! scappa!... chi è o ciù lesto
E o ciù bravo; e per fâ presto,
Tiavan zù mille giastemme!
Chi va storto, chi va drïto;
Mi son cheito per fâ fito
Nell’alzâme, e m’è schittôu
A perrûcca in to stûffôu!
Ghe ghe l’ho dovûa lasciâ...
Me tegnîvo e moen in testa,
Per no poeimela fasciâ,
Vaddo, scappo, e per ciù pæsta
Me bajava o Can apprêuvo...
M’invexendo, e ciù no trêuvo
O cammin pe andâ in cuxinn-a,
E m’infïo in t’ûnn-a cantinn-a;
O spruin d’ægua m’inorbiva,
Monto addosso a ûn chi dormiva,
Che o s’addescia ancon imbriægo,
Dà de man fito a ûn baston,
E me vêu mandâ a Legnægo!...
Me vegnì incontro o Patron,
Che a brassetto o me piggiò
E all’orbetto o me portò
Pe ûnn-a scaa de legno brûtta,
(Che ciù ûn pö me a piggio tûtta)
Appullôu, desperrûccôu,
Dove gh’ëa tûtta a Brigata,
Chi me fesse ûnn-a cioccata
Per no veddime negôu;
Se sciûgavan tûtti a-o fêugo,
Ma per mi no gh’ëa ciù lêugo
De sciûgâme; poeì capî
Scuavo pezo che ûn Barchî
E ve baste, che dov’ëa
(No ve conto de fandonie)
Ghe formeì ûnn-a peschëa...
O Patron complimentoso
M’ammassava da-e çeimonie,
E o me dè tûtto festoso,
Per cangiâme ûn pö a marscinn-a,
(D’ægua, maccie e sguäri pinn-a)
Unn-a specie de röbon
Giano, fæto ä biscochinn-a,
Che me paivo ûn gran limon:
O m’ha poi coverto a sûcca
Co-a so mæxima perrûcca,
Ch’o m’ha proprio arrecuveôu,
Perchè m’ëo zà magagnôu
E no favo che stranûâ...
Mentre o stavo a ringraziâ,
Acciappandolo pe-a man,
Veddo a gambe capitâ
Quello maledetto Can,
Chi se cianta fisso a miâme,
A anastâme, e a... rinfrescâme!
E accorzendose o fillon
Che ho a perrûcca do Patron
(Stæ a sentî ch’a l’è granïa)
In to collo o se m’asbrïa
Per levâmela, o m’addenta,
Oeggie e naso me scarpenta;
Comme ûn’Aquila sbraggiavo:
Dæghe, dæghe a questo diavo,
Ma l'aveivo sempre addosso;
Me difendo ciù che posso,
Streppa, agguanta, molla, tia...
Per fortûnn-a a se sguarrò,
A meitæ o se ne piggiò,
Che bajando o portò via,
L’atra in testa a me restò.
Fra i scrolloîn, fra e botte, a puïa,
E e vicende da mattin,
N’ëo ciù in caxo de parlâ,
No me poeivo ciù mesciâ
E cazzeivo a tocchettin.
Coscì bello e regaggïo
Me portòn presto in lettin,
Dove (dixan) che ho dormïo
Finn’all’indoman mattin,
Comme ûn Pûtto in sciö tettin.
Ecco cose m’è seguïo
Ne-a mæ bella Campagnata
Parlo solo dell’Andata,
Che ancon pezo fù o Ritorno
Ve o contiö, ma ûn atro giorno,
Che ancon troppo ve seccavo,
Stæme allegri, ve son scciavo.