Piaggio M. - Poesie 1846/Varietæ/Træto d'amicizia indigesto
| ←O Villan | Poexie de Træto d'amicizia indigesto |
O bon Conseggio→ |
| (ediçion Pagan - 1846) |
Unn-a votta o sciö Grighêu.
Un pö pigna de sò fâ,
Incontrando o sciö Domenego,
O l’inviò da lê a disnâ.
Mille grazie, o ghe rispose,
Scì vegniö, ma no vorriæ
Che per mi v’incommodasci,
Seì, che mangio, e beivo assæ;
Oh per questo stæ segûo
Che per voî no me sciätiö,
Semmo amixi da gran tempo
Comme amigo ve trattiö.
O gh’andò dunque zazzûn
Meneghin a-o giorno doppo,
Che dä famme chi o rödeiva
O l’andava mëzo soppo:
O sò solito, Grigheû,
E nint’atro o gh’appaèggiò,
Di poiscetti, ûn piccionetto,
E ûn-a fetta de ragò.
Poveo diao de Meneghin,
O no fè atro che bägiâ,
E co-a famme lunga ûn parmo
O finì quello disnâ.
Ne-o sciortî o disse a Grighêu,
Mi ve son tanto obbligôu,
Ma che fosci coscì amigo
No me sæ mai ciù pensôu.