Piaggio M. - Poesie 1846/Varietæ/O Villan

Da Wikivivàgna
Poexie de Martin Piaggio
O Villan
(ediçion Pagan - 1846)
[p. 837 modifica]
O VILLAN


Batteston aveiva o Poæ
Lì pe andâ all’eternitæ;
O speddìn presto a-o Gëxâ
O Rettô fito a ciammâ;
Ma o l’andò tanto ciannin
Che o stè træöe per cammin!

Finalmente o gh’arrivò,
Ma a piccâ o no s’incallò
Ne de sûnnâ o campanin;

O tegniva o scemmellan
Sempre o picco e a corda in man
Con demoâseghe ûn pittin;

Ma sentindo remesciâ
S’avanzò o Rettô a-o barcon,
E ghe dixe a-o Batteston:
Cose ti è vegnûo chi a fâ?....

Per ciammâve (o ghe rispose)
Pre mæ Poæ, che stammatin

[p. 838 modifica]

Ea lì lì pre tiâ o gambin:
Egnî sûbito?... E per cose
Ti non è vegnûo ciù lesto,
E ti n’hæ piccôu ciù presto?
Che me saivo destrigôu...

Prechè avæ puïa d'addesciâve!
E n’oggeìva destûrbâve!

Ma a quest’öa o sä zà creppôu!
Cose ho da vegnî ciù a fâ?....

No, che Giaxo mê compâ
M'ha promisso de demoâlo!
Egnî dunque a destrigâlo.