Piaggio M. - Poesie 1846/Varietæ/Disgrazia e Fortûnn-a
| ←O qui pro quo | Poexie de Disgrazia e Fortûnn-a |
O Villan→ |
| (ediçion Pagan - 1846) |
Duî compagni ancon de schêua,
Che no s’ëan mai ciù incontræ,
S’intoppon all’Accasêua,
E se son presto baxæ;
Ti stæ ben? l’ûn disse all’atro. —
Coscì là; me son majôu; —
Me rallegro — Ah no! che pe atro
Un serpente m’è toccôu; —
Me rincresce, amigo, assæ; —
Oh ma no! perchè m’ha dæto
Mille doppie in boîn dinæ; -
Bon negozio allöa ti hæ fæto;
Oh per ninte, perchè i ho
Impieghæ tûtti in bestiamme,
Che ûnn-a nêutte, mi no so,
O me moì de freido, o famme; —
Gran desdiccia! cose ho inteizo!
Oh ma no! perchè vendeì
Tûtte e pelli che m’han reizo
Ciù de quello che spendeì; —
Bravo, allöa ti l’è refæto! —
Oh per ninte; che è brûxôu
A mæ casa, e in fûmme andæto
I dinæ che gh’ëa serrôu. —
Gran disgrazia! Cose sento!
Un castigo veo do Çê!
Oh ma no! perchè gh’ëa drento,
E brûxò con lô a moggê.