Piaggio M. - Poesie 1846/Varietæ/Recipe per Sûâ
| ←Segretto pe andâ commodi in Carrossa | Poexie de Recipe per Sûâ |
Inconveniente pe-a someggianza→ |
| (ediçion Pagan - 1846) |
No so in che Universcitæ
Gh’ëa ûn stûdente bravo assæ,
Chi s’andò a fâ examinâ,
Per magnifico passâ
Da ûn Congresso de Dottoî
Bravi, e vegi Professoî.
Ghe domanda o Prescidente:
Sciä me digghe, Sciö Stûdente,
Se sciä andasse a vixitâ
Un chi no poëse mai sûâ,
Che rimedio sciä ghe dæ,
Perchè o sûasse presto, e assæ?
Gh’ordinieivo de bevande
De sambûgo, e d’orzo in grande.
Ma se queste no servissan,
E che i pori no s’arvissan?
Ghe fæ mette ûnn-a coverta
Imbottïa addosso ben erta,
E ghe a faivo redoggiâ
Se o no poëse manco sûâ.
Ma se questa a do bastasse?
Gh’ordiniæ ch’o se cacciasse
In t’ûn bagno cädo assæ,
Poi fûmenti replichæ.
Ma se questi ninte fessan?
Gh’ordinieivo, che ghe dessan
Un cûgiâ, mëzo gottin
Do ciù antigo, e mëgio vin
De Madera, o de Tintiggia,
E magara ûnn-a bottiggia.
Ma se manco ö fesse sûâ?...
O mandiæ chi a examinâ.