Piaggio M. - Poesie 1846/Varietæ/O Majo Orbo

Da Wikivivàgna
Poexie de Martin Piaggio
O Majo Orbo
(ediçion Pagan - 1846)
[p. 818 modifica]
O MAJO ORBO


Un Pappà aveiva ûnn-a Figgia
Coscì brûtta e desgaibâ,
E do cô da sabadiggia,
Che nisciûn a voeiva ammiâ!

E con tûtti i gren dinæ
Che per dêutta o gh’assegnava,
E a vistosa ereditæ
Che ä so morte ghe toccava,
No gh’ëa ûn can chi a domandasse,
Nè ûn despeôu se presentava
Per dâ fêugo almeno a-e strasse!

Senza aveì atri figgêu,
Con sta spinn-a appusa a-o coêu,
Giorno e nêutte o tribulava.

Finalmente capitò
(Quando meno o ghe pensava)
Un Sensâ, de quelli tali
Lescajêu matrimoniali,

[p. 819 modifica]

Che ûn partïo ghe progettò,
Chi sa dove destannôu!

O l’ëa questo ûn Batteston,
Orbo affæto diventôu,
Nell’etæ da discrezion;
Ma o l’aveiva qualche scûo,
E di ben de casa sò.

Pappà ä Figgia ne parlò,
E tramëzo a-o cæo e a-o scûo,
Con due parolette tenere
(Che per l’Orbo a l’ëa ûnn-a Venere,
E pe-a Brûtta o l’ëa ûn Adon)
A breviori se spozòn,
E contenti a casa andòn.

Conviveivan fra de lô
In perfetta paxe e amô,
Benedindo o giorno e l’ôa
D’aveì fæto quella ûnion;
Quando o diàscoa mascarson
O ghe voeiva mette a cöa.

Capitò in quella Çittæ,
Annunziôu da mille fêuggi,
Con patenti autentichæ,
Un Empirico Oculista
Chi rendeiva a tûtti a vista
(Finn-a a chi n’aveiva d’êuggi!)

A Moggê inconsciderâ
Presto o majo a vêu portâ
Da-o famoso Segretista
Perchè o ghe ritorne a vista;

Ma Pappà stæto avvertïo,
Da lê presto o l’è corrïo,

[p. 820 modifica]

E o ghe disse: per caitæ,
Figgia caa, e pe amô de Dio,
Ammïa ben cöse ti fæ!
Che o l'acquiste mi ne dûbito,
Ma con tûtte e to ricchesse,
Se to majo o ghe veddesse,
O te manda a casa sûbito.