Piaggio M. - Poesie 1846/Varietæ/I dui Coscriti
| ←Semplicitæ | Poexie de I dui Coscriti |
O Majo Orbo→ |
| (ediçion Pagan - 1846) |
Duî Coscrîti boin amixi,
Granatê (senza barbixi)
Un mincion, l’atro fûrbon,
S’impegnòn fra lö, e se zûòn
De non mai abbandonâse,
E a vicenda d’aggiûttâse
In qualunque circostansa
Comme i Paladin de Fransa;
Van ä guæra, e a-o primmo attacco
Unn-a balla de cannon
A te porta via per bacco!
Unn-a Gamba all’asperton,
E o destende lì pe-a stradda;
Presto presto so Cameadda
Scrupoloso d’osservanza
Con stentâ se o mette in spalla
Per portâlo all’ambulanza;
Cose voei?... ûnn’atra balla
Te ghe porta a testa via!...
Lê no se n’accorze, e gïa
Pe-i strazzetti ciù ch’o pêu
Sûando, e ansciando comme ûn bêu
Pe andâ fito a-o so destin;
O l’intoppa per cammin
A cavallo ûn Aggiûttante,
Che de veddio camallante
Quello bûsto decollôu,
O se ferma a miâ incantôu,
E ghe dixe, fêua de lê
Dove væto Granatê?...
O risponde « all’ambulanza
A portâ chi mæ Cameadda
Chi ha piggiôu a cannonadda
Senza aveìne l’ordinanza....
Comme! comme!... all’ambulanza
Un Sordatto senza testa?....
A st’antifona o s’arresta,
Presto presto in tæra ö caccia,
O l’ammïa, s’aççende in faccia;
Ah böxardo! (forte o cria)
O m’ha dito che o l’aveiva
Solo a gamba portâ via!
E mi sciollo ghe creddeiva!