Piaggio M. - Poesie 1846/Prefazioîn e Reviste da Çittæ/Revista1838
| ←Prefazion, Anno 1838 | Prefazioîn e Reviste da Çittæ de Revista, Anno 1838 |
Prefazion, Anno 1839→ |
| (ediçion Pagan - 1846) |
*
Parte Primma.
Son chì torna, Cattainetta,
Vêuggio fâ unn-a Cansonetta
Pe-a Revista da Çittæ;
Seì provvista de Nissêue,
Gh’eì de ciù di Portughæ!...
Fæ ben, brava! v’inzegnæ,
Anchêu voeì fà parpaggiêue!...
Vegnî dunque, andemmo a giâ,
Voi vedieì; mi ve contiö
Tûtto quello che veddiö
Da doveìse rimarcâ
Ne-o travaggio fæto nêuvo
Pè abbellî a nostra Çittæ;
Andæ là, ve vegno apprêuvo
Ghe i hò dusci i portughæ!
Zitto lì!... Che poi sbraggieì,
Stæ a sentî, no dubitæ,
Trovieì sempre di accattoeì...
Tûtto quello che osserviö
De ben fæto, o fæto mâ,
De zà fæto, o ancon da fâ,
Sotto banca n’ö passiö,
Che ve diö dove me dêue...
Brustolie e ma nissêue?
Stæ a sentî, zûarisoræo!
Son Zeneize, e parlo cæo,
Ma no parlo per livô,
Ne per coæ de scindicâ,
O per smania de ciarlâ,
Ma per zelo, e patrio amô
E per pûbblico vantaggio;
Andæ là dunque, corraggio,
Giandonemmo, e vei sbraggieì,
Figgia caa, quanto vorrieì,
Che chi no s’aggiûtta mêue....
Brustolie e mæ nissêue!
Ghe i hò dusci i portughæ!....
Va beniscimo: osservæ,
Comâ caa, comme stan megio,
Pe-e grondann-e incannellæ
E Bûtteghe senza i Toæ...
E co-e Mostre dizertæ,
Senza intrâ, de fêua me spegio
Cose han drento, pe accattâ....
Lezo in faccia ao Bûttegâ,
Veddo megio o fæto mæ,
No me pêuan ciù inverdûgâ,
Spendo megio i mæ dinæ....
Ma che belli portughæ!
E poi son ciù cæe e ajose,
Resta e Stradde ciù spaziose,
No piggiæ tanti spuncioîn
Da nissâve e costiggiêue,...
Brustolie e mæ nissêue!
De Palermo i mæ çetroin!
Posso andâ senza scontrâ
Ciù in te corbe, o in ti barrî,
E se hò sprescia, ben corrî
Senza aveì da giastemmâ;
Ammacciâ ciù no me posso,
No me schitta l’êujo addosso
De biscasse in mezo ä stradda,
Che son tûtte in ritiradda
Finn-a e poële co-e rostie....
Nissêue longhe brustolie!
Osservæ a frûta, e a verdûa
Che no piggian ciù de pûa,
Stan a susto a maturâ
A marsî, dunque a seccâ!
Cioè, a seccâ, dunque a marsî...
Ciù bagnâ no ve sentî
Manco da-e Revendajêue,
Comâ caa... cose ne di?...
Brustolie e mæ nissêue!
Mà s’appattan co-a caladda
E o cacciâ e fêuggie pe-a stradda!
Per fâ ûn pö scûggiâ e personn-e,
Che s’imbriguan di Cavæ...
G’hò e nissêue brustolie bonn-e!
Dusci dusci i portughæ!
Dæ ûn pö mente, Cattainin,
Comme van (adaxettin)
Giornalmente lastregando
Tante stradde, e van levando
Tûtti quelli montechinn-a
Angosciosi pe-a Çittæ...
L’è ûn piaxeì quando passæ
Là d’in stradda Lomellinn-a,
Inocampo, da Sanscî,
Finn-a a Banchi poeì vegnî,
Co-a podraga, e con i calli
Senza ciù ciammâ i camalli...
E se ciêuve passeggiæ
Senza manco o pægua arvî,
Ne ciù e braghe v’appullæ...
Ma che belli portughæ!
Se da-i Fraveghi passieì,
In Susseivia, o d’in Campetto
No trovieì ciù ûn becchelletto,
Nei rissêu ciù no montieì
Per piggiâ di puntapê,
O ammaccâve (con rispetto)
Se corrî ûn pö troppo, i pê!..
Andæ comme in sciù vellûo...
Ma i bandiän tûtti, segûo;
Questi sasci maledetti
Che fan disonô ä Çittæ,
E in te çerti caruggietti,
Comme quello dove stæ,
Son vegnûi tanto appissûi
Che son pezo che i agûi!
Diggo ben? o diggo mâ?
Me ghe strêuppio in to passâ,
Che me fan scciûppâ i brignôin...
Son tûtt'agro i mæ çetroin!
Figgia caa, no v’arraggiæ,
Dæghe tempo, che i levian,
E magara ghe mettian,
Pè avansâ de parpaggiêue,
Quelle lastre rotte e uzæ
Che se scarta dä Çittæ...
Brustolie e mæ nissêue!
Ghe i hò dusci i portughæ!
Unn-a stradda, che veddiemo
Fra e ciù belle, e regolæ,
Se però no s'inghêuggiemo
(Comme vêuggio ben sperâ)
A l’è a Giulia, ma però
Quando a sä tûtta allineâ,
Drita in lenza, e ûn pö allargâ,
Comme So Maestæ ordinò;
E scentiä quelle trabacche
Laterali de Baracche
Là dä Gexa, e o Cazottin
Da mosträghe i burattin
Tûtto morsci, e ciappassêu!...
Comme scentò, Cattainin,
Quell'enorme Fabbricato
Verso e Porte, ch’ëa tropp'ato,
E o croviva proprio o coêu!...
In Çê voeiva andâ o Padron!
Ma o l’hà avûo tanto giûdizio
De piggia a so dimiscion,
E o l'è andæto in preçipizio
A sodisfazion comun
Senza fâ danno a nisciun,
Meno ä borsa do Sciô.... Tizio!
Gran lezion pe-i Fabbricanti,
E Padroin Archittettanti,
Grande avviso ai Architetti!
E.... ma discorimmo d’atro....
Portughæ che paan sciurbetti!
Eive chi, semmo da-o Teatro;
Dæ ûn pö mente, Cattainin,
Che maestoso Fabbricato,
De bellezze interne pin,
Chi trionfò da-o scindicato
Dell’invidia e di mincioin,
A gran lode, gloria e onô
Do fù Barabin Autô.
Ma però digghe chi vêu,
(Forse diö ûnn-a mincionnaja)
Quella Ciassa co-i rissêu
A me pâ ûnn-a meschinnaja!...
Lì ghe và o so lastregato
D’ûn disegno ben ideôu,
Conveniente ao Fabbricato;
Tanto ciù ch’a l’è gran Ciassa
Dove se ghe fà o Mercôu;
E quell’atre rastellee
De Carozze e Rebellee
Che impediscian chi ghe passa,
E bezêugna per andâ
Di gren zigghe-zagghe fâ
E piggiâ de scurriatæ....
Ma che belli Portughæ!
Se ghe fosse ûn atro scito,
Ghe i asbrieivo fito fito....
No ghe n’è.... ch’o n'è ancon fæto,
L’han da fâ.... cose giappæ?....
Se no i mandan all’Uspiâ!....
All’Uspiâ, o dunque all’Uspiæto,
E magara ai Incroxæ!....
No ghe saiva miga mâ
De levâ lì tante rêue,
Fâ scentâ tanti timoin,
E ûn’armâ de sussurroin,
Trippe pinn-e, e sûcche vêue...
Ghe i hò longhe e mæ nissêue!
De duî sûghi i mæ çetroin!
Guardæ ûn pö, Cattarininn-a,
Quelle Trombe senza son
Fabbrichæ pe-o Sciô Latrinn-a
Che là all’aria sempre son!...
L’è ûn peccôu levâe de lì,
Gh’aççendieiva ûn lampiron
Pe ëse viste ä nêutte ascì!...
Ma per megio conservâle
In te l'êurio, e non guastâle,
E fascieivo con de stêue,
Gh’applichieivo i so zerbin...
Brustolie e mæ nissêue,
Son pin d’agro i mæ çetroin!
Comâ caa, cose ne dî?
Son ciù cose da proibî
Che i mæ Vasi, e che e Meizann-e!...
Ecco a Ciassa de Fontann-e,
Comme a l’è ben lastregá!
Bella ciann-a, l’è ûn piaxeì,
Se ghe pêu finn-a ballâ,
Se i rissêu ûn pö tappâ
Quello Fossôu là, veddeì!...
Da-o Palazzo Negronesco
Dove aspëto e lettee ao fresco,
Gh’applaudieiva con raxon
Tûtto Zena cö Patron,
Ghe mettiæ mi ascì ûnn-a man...
Basta... ûn giorno s’aggiustian...
Quando ciûviä parpaggiêue!
Cose eì dito, Cattainin?
Brustolie e mæ nissêue!
Mi ghe i hò che paan balloin!
Cose? cose?.... i portughæ!
M’hò stimmòu che fussan peæ;
Favorîme ûnn-a nissêua
Che ao-a andiemo all’Accassêua;
Ma allunghî e gambe, Comâ,
Dunque no poeì ciù passâ...
Là gh’è duzze Mû inrestæ,
Fortemente careghæ,
Guiddæ solo da ûn Mûatê
Chi ghe stà sempre derrê
A fummâse a so pippetta...
Dæ ûn pö mente, Cattainetta.
Povee bestie! comme o i pesta!
Che bacchæ o ghe dà in sciâ testa?
Che per trappa o l’hà ûn legnamme!
N’è zà cheito dui per tëra
O pe-o carego, o pe-a famme,
O pe-e botte che o ghe dà!...
Se ao-a o fosse io Inghiltëra,
L’aggiustieivan comme và...
Sci, davveì! cose ghe faeivan?
Presto in corbona o ficchieívan
A ægua e pan! trei giorni doppo
A ûn’emenda o condannieivan,
Perchè là coscì se fà
A chi batte e bestie troppo,
E e fà troppo camallâ;
Lezionetta ben schissâ
A chi insegna a crûdeltæ!
Ma che belli Portughæ!
Ecco là a gran Passeggiata
Che mancava ancon a Zena;
Che spaziosa e bella intrata!
E che scituazion amena!...
Han slargôu do doppio a stradda?
Bravi!... han fæto l’atra arcadda
Sorve e porte?... và benon!...
E g’han fæto o so mûaggion?
Senza tanto cornixon...
Bravi, bravi!... ao-a se pêu
Circolâ comme se vêu;
No gh’è ciù montetti e fosse
Da rompî o collo ai figgiêu;
Pêu passâ liberamente
I Cavalli co-e Carosse.
Bello sfêugo pe-a gran gente
Che frequenta l’Accassêua
Pèr rescioâse ûn pö o pulmon.
Ve ringrazio da nissêua,
Dæme ûn ghælo de çetron
Poi ve dö ûnn-a parpaggiêua:
Dæ ûn pö mente se o Laghetto
Pe ægua o g’hà sempre do zetto?...
No, g’han fæto di Vialetti,
L'han farsïo tûtto d’erboetti,
E g' han semenôu do fen...
Bravi, bravi! han fæto ben,
Han pensôu per noi ûn pö ascì,
Mille grazie!... ma me pâ
Che ghe staiva assæ ben lì
Un’orchestra rilevâ,
Ellegante pe-i Sunnoeì;
Perchè a Banda avvixinâ,
E a cian d’ægua no a godeì;
E poi tûtti i Muxicanti
Quando sêunnan son frusciæ,
E spunciæ da-i circostanti;
Se a sentîli ve fermæ,
Seì schissâ, seì frettellâ
Da chi è fermo, o vêu passâ...
No se gûsta i armonie
De sûnate e scinfonïe,
Che eseguiscian; no sentî
Che o fracasso, e che o ton-ton
Da catûbba e do trombon,
Fæti apposta pê insordî!...
Quando invece, Cattainin,
Sciù in Orchestra se sentieivan
Dä lontan e da vixin,
E assæ megio se godieivan
Dai Narcisi e da-e Ninfette
Assettæ ne-e careghette
Per spegiâse e fâse ammiâ!...
Diggo ben, o diggo mâ?
Un' Orchestra?... mâ se a gh’ëa
De Carubba... (a ûso braxëa)
E da mettise e levâ.
A l’è bassa e miserabile,
A ghe vêu grande, äta e stabile,
E da poighe stâ assettæ...
Ma che belli portughæ!
Misê ûn pö là, quanta verdûa
E che ricca alberatûa!
Quelli Platani! ma boâ!
Quelli Accacci fan figûa....
Hà piggiôu campo o cornâ,
Manca l’aænn-a, e cresce a pûa
In te quelli marciapê...
Quelli quattro mostaccioli
No fan mai gamba ne pê,
Ghe vorrieiva in gïo i poggioli
E arricchîli con di sciammi
D’Erbe ezotiche e Fiorammi...
E bezêugna ûn pö levâ
Tante corde che stan mâ!
Belli i Salici piangenti,
Quelle Rêuze a ûso mortin
Son veamente sorprendenti...
E a quell’atri boschetto
A-o sarvego pe-i Stûdiosi!
Ghe dî osso, Cattainin?
Saan cö tempo deliziosi;
Quanti colpi mäveggiosi
Gh’è dè vista ogni pittin!
Che magnifico Locale!
E dov’ælo ûn atro eguale?...
Ma ghe manca ûn scitettin,
Dexideôu e necessajo...
Un Caffè? dunque ûn Cazin?
No scignora!... ûn Necessajo
Per no fâsea in ti cäsoin!...
Ma per bacco! dä Peschêa
Manca sempre a so Ringhêa
E poca ægua dà o bronzin!...
E per bacco! no gh’è manco
Drento a statua colossale,
Monûmento nazionale
Per Colombo, in marmo gianco,...
Celebròu da ogni Nazion,
Solo in Patria in oblivion.
O n’è miga ûnn-a fucciara?
Ma ben presto ghe o mettian....
De Lê degno......e dove l'han?
In te Cave de Carrara!...
Veddeì quello fabbricato
Chi primezza e fà do sciato
Fêua de Porte, Cattainin!
O l’è n Manicomio.... o sò
Perchè ûn matto me o mostrò..
Ah! parlæ co-i matti ascì?
Ghe n’è tanti!... Signor scì...
Brava! ammiæ che son burloin!
Ma vorriæ vedde ûn pittin
Cose?... dove è o ponte nêuvo
Che se fabbrica in Bezagno,
Con ciù o çerco mi nö trêuvo...
O l'hà sempre e gambe a bagno;
In sciù prôu che ve n’andæ...
Ma che belli portughæ!
No sbraggiæ ciù, Cattainetta,
Bonn-e fighe! pe ûn momento;
Perchè stanchettin me sento;
Accueghæve in scie l’erbetta
Che coscì passieì a bile;
Mi m’assetto in sciun sedil
E ghe pöso o chittarrin
Che grattiö da chì a ûn pittin
Per finî a mæ Cansonetta,
Se gh’ei testa, Cattainetta,
Che seccâve no ve vêuggio....
(Segno o resto in atro fêuggio).
*
Parte seconda
Ho gh' eì perso, Cattainetta,
De stâ a criâ li in sciè l’erbetta,
Che anzi eì fæto parpaggiêue...
Eì smaltïo tûtte e nissêue,
E gh’eì ciù ûn pâ de çetrôin,
Che ve i han tûtti spremmûi,
I restanti son vendûi...
Brava-brava!... ghe seì dï
Co-i asperti, e co-i minciôin,
E seì fæta pê[sic] inricchî...
Sciâ no careghe!... davveì!
E n'avieivo ben piaxeì...
Scì!... con vende duî çetrôin
E smaltî, frà pinn-e e vêue,
Un paneetto[sic] de nissêue
Mettiö insemme di mjôin!
Sciâ no bûrle, Sciô Reginn-a,
Ghe vêu atro a fâ dinæ
Che... Comâ, no v’arraggîæ,
Ghe mettiö a nomme Zaninn-a!
Ma che belli portughæ!
(E che vorpe soprafinn-a!)
Zacchè semmo chì assetæ
Belli comodi e ûn pö sûæ,
Senza andâse ciù a stancâ,
Se porrieìva ûn pö parlâ
Da gran Stradda Carettêa
Che, per dî ûnn-a cosa vêa
Che nisciun pêu contrastâ,
Meno i zuveni stordij,
O i vegiornie rimbambij,
A dà l’anima ä Çittæ;
Parlo, quando a sä finïa
Co-i so casamenti in fia
Belli nêuvi o ristoræ,
Co-e facciate in scimetria,
E bûtteghe, i bûtteghin,
Porticati, magazin,
E co-e ciasse improvvisæ,
A l'amplifica o quartê
Troppo populôu de Prê,
Dove ëan comme i pescisæ!...
A-o vivifica, a-o risann-a,
E dä Darsena, dov’êa
Quell’ambiente de galêa,
Quella spûssa de chintann-a,
A ghe rende l’aja sann-a,
Da poeì stâghe senza puia
De piggiâse ûnn-a terzann-a,
O möi dä malinconia!...
Comâ caa, cose ne dî?
Che và tûtto ben ... capiscio...
Ma Voscià sciâ hà bello dî!...
E mi incangio compatiscio
Tûtta quella povea gente,
Che g'han fæto piggiâ o liscio
Da Levante e da Ponente,
Mezogiorno e Tramontann-a
Per çercâse ûn pô de tann-a
Comme mi!... dî ben, capiscio,
Comâ caa, e ve compatiscio
Comme ho compattio e lamente
Che façeiva tanta gente,
Perchè ëan giûste e raxonnæ...
Ma fæ ûn pö diversamente,
Quando o l’è ûn Travaggio pûbblico,
Figgia caa, lì no gh’è replica,
Che sciorbî bezêugna o Recipe,
Meschin quello che o ghe capita!
Ma a se pessa co-i dinæ,
E de fæti co-e mutette
Han pessôu braghe e fädette,
E a voî ascì ve n’è toccôu,
E aoa seì tûtti assostæ...
Sciâ vêu di missi a stûffôu!
Ma che belli portughæ!...
Ma vegniä ben presto o giorno
Che porrieì fâ a Prê ritorno,
Perchè e case no manchian,
E e pixoin tûtte chinian...
Sciâ diä ben, ma mi no creddo
Finn-a che no tocco e veddo!...
Scì Comâ, eì da vedde tanti
Si appiggiona in tûtti i canti,
Da inorbîve .... e i Poscidenti
Diventan ciù raxonnæ,
No-a tegnian ciù tanto ai denti,
Ma mollian per fâ dinæ,
Ne aveì sempre e case vêue
Con di Ratti e de Teagnæ!....
Comâ caa, cose ne dî?...
Che no g’hò ciù de nissêue;
Vaddo a fâne brustolî...
Aspëttæ, che poi gh’andieì,
Mundæ incangio i duî çetrôin
Che coscì o conto saldieì;
E parlemmo ûn pittinin
Da Facciata da Nunziâ
Che no veddo l’ôa e o momento
De poeì vedde prinçipiâ,
E, Dio vêuggie, terminâ ...
Perchè a sä ûn bell’ornamento
E do Tempio, e da Contrâ;
Restiä a ciassa ciù allargâ,
No veddiö ciù quella mûaggia
Coscì sgrezza e pertûzâ.
Nio de ratti e de scorpioin,
Che d’ammiâla a mette raggia,
E i foresti a fà giappâ!...
Ne ciù quelli Campanin
Che ve vegnan zù a tocchetti,
Ne a scainâ inciastrâ de vin,
Zêugo e cloacca ai garsonetti,
E biscassa pee donnette
De fainâ e de fûgassette!...
Ma sä a tûtto rimediôu,
E da quanto hò sentïo dî
Se leviä de lì o mercôu,
Comâ caa... cose ne dî?...
Che ghe n’è da carne ao fêugo!
Ma de grazia? in te che lêugo
L’han da mette? gh’assegnian
Un locale, che formian
Bello, grande espressamente
Da poeì stâghe ancon ciù gente,
Comme ûn atro pee Carosse...
Va ben!... basta che se posse
Trovâ o scito... l’attrovian
Ne-a gran Stradda Carettêa,
E veddiemo sbarassâ
Tûtta a Ciassa da Nunziâ
Da qualunque Rebellêa;
Se passiä senza inganciâse
Ciù in te corbe e in ti timôin,
Manco e oeggie ciù tappâse
Pee giastemme, i sacradoin,
Aççidenti, imprecazioîn,
Da fâ cazze proprio o Çê,
De quell’orda incoreggibile,
Irrequieta e incontentabile
De vettuîn e carossê!...
Gh’arranchian quelli Rissêu,
Che me mettan l’anticoêu
E nisciûn pêu ciù soffrî,
Lastregandoa con de prie,
Comâ caa, cose ne di?...
Nissêue belle brustolie!...
Che và tûtto ottimamente;
Ma mezzen pe-a povea gente
Da pagâ poca pixon
Non ne veddo nasce ancon!
Quando l'è che i fabbrichian?...
Neccessaj son comme o pan!
No se i han miga scordæ?...
Eì raxon, ma no pensæ,
Ghe mettian ben presto man,
Perchè son stæti ordinæ.
Ma che belli Portughæ!
Vegnî matta!... e cose criæ?
Se no gh’eì ciù ninte!... crio
Per no perde o vizio... brava!
Comme a vorpe!... ma hò capio
Criæ pe-o Sciòetto chi passava,
Ch’o l’è là tûtto instecchio....
Miæ che barba!... o pà ûnn-a crava!
Co-i mustasci longhi affiæ,
E i cavelli pëttenæ
Comme e Donne!... ghe scommetto
Che o s’è dæto ascì o rossetto,
Perchè o l’è troppo buffûo...
A strenzaggia o l'hà segûo
Perchè o marcia troppo reddeno ...
Miæ che grillo! o no pâ ûn Satiro?
Comme o fà fischiâ a trappetta!
Che sciollûsso!... forse o vêu
Fâ vegnî i vermi ai figgiêu?
Rispondeime, Cattainetta,
Che stæ lì tûtta modestia...
O vêu piaxe a tûtte e belle!...
Hò capio!... e voî seì de quelle
Che ghe piaxe l’ommo bestia!
Grazie! bûrlo; ma parlemmo
D’atro e a Zena ritornemmo
Per finî a nostra Revista...
Andæ avanti a fâ provvista
De nissêue e de çetrôin,
Ve perseguito derrê,
V’aspettiö da San Mattê;
Vegnî fito, Cattainin,
No me fæ scappâ a pazienza,
Dunque rompo o chittarin;
Addio, staggo in attendenza!...
Dæghe là, mescæve presto
(Segue in atro fêuggio o resto).
*
Parte Terza e Chiusa.
Brava, brava, Cattainetta!
Seì veamente ûnn-a donnetta
In sciâ giûsta comme và,
E seì ben dâve d’attorno...
V’hò lasciôu ûn momento fà
E seì zà chi de ritorno
Co-i Çetroin e co-e Nissêue...
Cose gh’eì sotto?... de Ciocche
Per berlicche! e per berlocche!
Voeì fâ in tûtto parpaggiêue...
Gh’eì azzunto a Castagnetta
Perchè seì ch’a l’è gradìa,
Brava, brava! Cattainetta:
Ma per rendive compìa
Ve ghe manca ascì a Viovetta
Co-a brocchetta de Gazzia ...
Sciâ gh’azzunze i Marunzini
E i Canoin comme i Neggiæ!...
E a Ventuela!... ve a scordæ?...
Sciâ no dagghe biscontini ...
Ma che belli Portughæ!...
Anzi no, ve lodo assæ,
Che o mestê ciù bon da fâse,
L’arte megio da imparâse,
Quella a l’è de fa dinæ!...
Gh’è i hò dusci i Portughæ!...
Gh’ò e Nissêue, chi vêu sciaccâ!
Ciocche, ciocche da spellâ!
De Palermo i mæ çetroin!...
Figgia caa, no sbraggiæ tanto
E piggiæ ûn pö de respïo,
Dunque ghe lasciæ i pulmôin...
Barbasciûscia! me ne rio,
Son de bronzo i mæ rugnôin!...
Comme o vostro barbacïo?
Sci Scignore, e me ne vanto.
Veddeì là?... in te quello canto?
Gh’è l’intrata da gran Fabbrica
De Rosolij stimatiscimi
Stabilia dall’abiliscimo
Nostro Sciô Bâzigalô,
Chi s’è fæto fama e onô,
E o n’ha ûn smercio sbardellôu
Pee fortiscime domande
Che ghe ven da tûtte e bande;
Lì gh’è tûtto raffinnôu,
Se travaggia a perfezion,
Se lambiccâ tûtto l’anno
E se vende senza inganno
Roba bonn-a a prexo bon.
N’hò piaxeì; quando porriö ...
Forse primma, n’accattiö;
Dove andemmo aoa?... m’appenso
Basta, andemmo da San Loenso,
Traversiemo Ciassanêuva ...
Miæ ûn pö là, che bell’effetto
Fà da lonxi a Stradda nêuva!
Descrovî de chì Cannetto,
Cottellaja... và benon!
Un belliscimo Straddon ....
Ma dov’ælo o rinnomôu
Gran Tratteur da poco prexo.
O famoso San Zenexo?...
O l’è zetto diventôu!
Dove andiän tanti riccoìn
A pranzâ?... no ghe pensæ,
Che de Bettoe pe-a Çittæ
No ne manca, Cattainin!...
E a so Ciassa, che sciâ voeìva
Co-i sò versci fâ ingrandî,
Dove a l’è?... scì me o credeìva,
Ma a no gh’è posciûa riûscî!...
Hò sentio però applaudî
E raxoìn che hò misso fêua...
Sciâ se meita ûnn-a nissêua,
Che me son piaxûe a mi ascì,
Mà... aggiæ flemma ... scignorscì.
Nasce funzi ogni momento,
E speranza in coêu me sento
Che ingrandî a Ciassa veddiemo,
Nè ciù o collo se storziemo
Per poeì vedde o Campanin...
Son tûtt’agro i mæ Çetroin!
Che, azzunzendo sei scalin,
Comme devan, ä Scainâ,
Pe-o terren c’han da asbasciâ,
Addio Ciassa!... Cattainin,
A diventa un Carouggietto,
Dunque torna Case in zetto,
Speise, crij, lameniazioin,
E dîstrasci senza fin! ...
Opus publicum! Comâ.
No l’intendo mi o latin ...
Son pilloette da collâ,
Ma c’ûn pö de patrio amô
E gren scûi!... se passa o dô..
E paghiä... chi hà da pagâ,
Perchè è ben che a Cattedrale
D’ûnn-a ricca Capitale
Aggie o so bello Ciassâ
Pe-i motivi che hò zà dito
E no vêuggio replicâ...
Se a ghe vêu, che a fassan fito,
Che ai dinæ no se gh'ammia...
Quell’Archioto zà o và via.
Scì Scignore, me l' han dito...
Antro d’Eolo, e imboccatûa
Da piggiâse ûnn-a puntûa
E lasciâghe a pelle e o peì! ...
Và benone! n’hò piaxeì,
Ghe restiä ciù scimetria,
E Passandoghe d’inverno,
Quando zêugo qualche terno,
No restiö ciù arrensenia!...
Manco ciù a-o streito passieì
In to Caroggin do Fî...
L’ingrandian lê ascì? davveì!
Comme a Ciassa!... sciâ vêu dî?...
Hò capìo, me careghæ!...
Ma preghæve sanitæ,
Che vegniä o tempo, Comâ,
Che in carossa gh’ei d’andâ ...
Ciocche, ciocche! portughæ!
Cicche-ciacche!... scuriattæ!
Scì Scignora! in carossetta!
E per fâ e cose compie
A tia quattro, Cattainetta...
Nissêue longhe brustolie!
Ma che belli portughæ!....
Fæ i passetti ûn pö ciù asbriæ,
Che ven tardi... caminemmo,
Taggiæ cûrto, e a Pré passemmo
Perchè o tempo scappa via.
Scì Scignore... andemmo, andemmo.
Cose gh’è lazzù? se cria,
Se giastemma!... se vêuan dâ?
Son figgiêu, lasciæli stâ,
Meschin quello chi i ammïa!...
Fûmman zà de quella etæ!
E azzunzeighe, avian bevûo
L’æguavitta de segûo!...
Oh che diai descadennæ!
Dan fastidio e fan gambetta
A chi passa!... Cattainetta,
Andæ drita, no i çerchæ
E lasciæli sbatte e criâ,
Dunque sciorte a mezo e moæ,
Ve senti ancon matrattâ
E piggiæ de ciù de botte,
Comme hò visto de atre votte...
E se capita i sò Poæ;
Ve ghe fan corrî i çetroin,
E nissêue, e ciocche e o çestin
Per premiâne i sò figgiêu!
Giûsto quello che ghe vêu,
Scì Scignora! pe edûcâli
E pe instruîli!... cioè sforzâli
A vegnî poco de boin!...
O l’è o stesso, Cattainin;
Son pe-e stradde abbandonæ,
Senza impâ nisciûn mestê,
Vagabondi pe-o Quartê,
Cose voeì che possan fâ?...
Zûgâ, dâse e giastemmâ!
Scorrî gatti e chen, azziâli,
Spremmij, battij e poi ligâli,
Rebellâi, cacciâli in mâ,
Fâli muî neghæ, arraggiæ,
A-o bersaggio de sasciæ
Con applauso (a n’è da credde!)
De chi stà contento a vedde
Questa schêua d’atrocitæ!...
E azzunzeìghe e gren meschiggie
Che se fà de mascci e figgie!...
Ciocche! ciocche! portughæ!
Cicche, ciacche! ghe a ciocchiæ!
Senza fâghe però mâ;
Castighieìvo i Poæ co-e Moæ...
Dî beniscimo, Comâ,
Che per fâ emendâ i figgiêu,
I Poæ e Moæ solo ghe vêu;
Vigilanza e exempio bon
Son a primma edûcazion,
Che cö vin, giastemme e zêugo
D’emendâli no gh’è lêugo,
Anzi imparan da-e giastemme
Sole, tûtti i vizj insemme!!
Sciâ m’hà fæto a Dottrinetta?
Cattechismo, Cattainetta,
Nö scordæ, se ve majæ...
Ma che belli Portughæ!
Là gh’è ûn Orbo cö violin,
E ûn’Udienza streppitosa!...
Cose o canta, Cattainin?
Qualche Istoja mäveggiosa!
A Canson da Rucca!.... ohibò!...
Se a memoja tûtta a sò,
Che me a cantan pe-o caruggio
I figgiêu!... bello struffuggio
Senza rimma e senza seximo,
A ciù cosa insûlsa e oscena
Da cantâ se in... se l’è o meximo
Che no ghe dan mente a Zena;
Vegnî, andemmo fêua de porte...
Cose gh’è?... sento ûn lamento!...
Quante scrossôe![sic] sciâ se vorte:
E cos’ælo ch’intra drento?...
Un convoglio de strûppiæ
Con bagaggi, armi e canoin!
Regaletto pe-a Çittæ...
Sci! d’ûn bello assortimento
De figgiêu, donne e strassoin!
E chi sà qualche maottia
Da portâ ûn’epidemia!...
No ghe n’è ancon de spavento!...
E azzunzeighe, Cattainetta,
Che san dî a so cansonetta
Comme và, per fâ dinæ,
Perchè o fan per proffescion....
E i levian coscì ai nostræ!...
Ma che belli portughæ!...
Dæme ûn ghælo de çetron,
Che m’eì fæto vegni sæ!...
Scì, e ghe schisso ûnn-a nissêua,
C’ûnn-a cioccâ ben mondâ,
Poi piggiêmo a parpaggiêua...
Eì raxon, me l’ëo scordâ:
Eive chì, semmo arrivæ
Fêua de Porte... scappa-scappa!...
Oh quant’Axi imbardellæ!...
E quanti Aguzzì co-a trappa!...
Cose fan li sparpaggiæ?
Ingombrando tûtta a Ciassa.
Con montâ addosso a chi passa!...
Ghe n’è finn-a di spellæ!!...
Fan a caccia ai Villezzanti
Montagnin, e a chi và ai Santi.
Quelli là forse che arrivan?...
Scì! retiæve, Cattainin,
E da-i axi, e da-i garsoin,
Perchè dunque no ve schivan.
Che trappæ ghe dan! meschin!
Povee bestie!... e comme vivan?...
Miæ che razza de canaggia!
E che griffi da Beduin!
Un giastemma, l'atro o sbraggia;
Questo o i spnocia, quello o i pesta;
Chi ghe punze a côa, chi a testa;
Trotta ûn aze, l'atro o schitta;
L'atro o scappa... oh che canaggia!
Tûtti vêuan fâ montâ o sò...
Gh’è o pericolo da vitta,
Oh che confûxion! ohibò
Unn-a cosa chi fa raggia
Da doveìse rimediâ.
Dî beniscimo, Comâ,
Eccoi là tûtti montæ...
Ma che belli portughæ!...
Scì, galloppan pè ûn momento
E poi van de passo a stento,
Co-i garsoin derrê obblighæ
A sbraggiâ, e a piccâ sûnanti
Legnæ ai Axi e ai Azenanti!...
Và benone!... ma frattanto
Fan levâ o pan ai Camalli
Che stan là a bâgiâ in t’ûn canto,
E a grattâse... a-e moen i calli!
E azzunzeighe, Cattainetta,
Che no ghe pattieìvan tanto
Se montassan di cavalli...
Scì scignore! e mi Donnetta
Scì, ciù fito, in mæ veitæ!
Che montâ de Rozzue ûzæ
Co-i Flagellatoi derrê,
Mille votte andieìvo a pê,
Dunque in bûsciua me i spendiæ,
Per no fâ perde o mestê?...
Ma che belli portughæ!...
Eive là San Benedetto;
Cattainetta, andæ adaxetto,
E ammiæ ben dove montæ,
Figgia caa, che no scûggiæ!...
Quanta bratta!... e dove passo?...
Ghe vêu i sgampi!... e comme fasso?...
No to dove mette i pê!...
Dove ton i marciapê?...
No ghe n’è, chi no se n’ûza,
Son bandii da sto Quartê!
Oh che sascio! o me pertûza!...
Scignoria... torno in derrê,
Che se scûggio, me gh’appundo,
E se cazzo, me sproffundo
E ghe nego... Scignoria... '
Oh che brûtta traversia!...
Cose gh’ælo intervegnûo?
L’atro giorno l’è ciûvûo.
Quando ciêuve, gh’è coscì?...
Scì Scignora, e a stesse li!...
Che de votte se gh’allaga,
E chi n’hà giûdizio, a paga,
Che intoppandoseghe a-o scûo
O ghe naufraga segûo!...
E perchè no se ghe dà
Ben recatto comme và?
L’hò zà dito e replicôu,
Ghe l’hò in mûxica cantôu,
Ma nisciûn m’hà ancon sentïo....
Ghe ne daivo torna ûn tïo,
Se l’avian forse scordôu...
Eì raxon, dî ben, Comâ,
Che ûnn-a Stradda comme questa
Giorno e nêutte frequentâ,
A n’è miga ûnn-a foresta
Da lasciâse sprofondâ!...
Cose deve dî i Foestê
De no poeì trovâ o sentê!...
Lì ghe vêu a so Selciatûa
De prïa forte e ben ligâ,
Per levâghe a bratta e a pûa,
Che de Stæ a ve fà negâ!
Che o Mosaico co-i sascetti
O stà ben ne-i gabinetti...
Se m’han dito che de Stæ
Tûtti i giorni a l’è adacquâ?...
Scì, con quattro benardæ
D’ægua sûbito sciûgâ,
E se caccia in mâ i dinæ...
Ma che belli portughæ?...
Lì ghe vêu i so marciapê
Praticabili e vixibili
Da tûtt’öe da chi và a pê,
E ai cariaggi inacessibili;
Lì bezêugna ascciannâ e fosse
Per non fâ inversâ e carosse,
Ne piggiâ di strambaeloin
Da rompì o collo a-i Pedoin!...
E per fâ a cosa perfetta
Bezêugnieiva, Cattainetta,
Arrivâ finn-a ä Lanterna...
Saiva allôa ûnn-a cosa eterna!...
Chi ve o dixe?... co-i dinæ,
Primmo punto!... e co-a voentæ,
Bonn-e brasse, e da gran gente
Se và sciù comme o crescente,
E se fà o dovûo ristöu
Ao Quartê de San Teodöu,
Perchè o l'è comme in Çittæ,
Agri e dusci i portughæ!...
Mi o scciûppetto l’hò sparôu.
Bravo, bravo t... e se campiemo
Speo che presto ne veddiemo
Un feliçe rissûltôu.
Voî, zacchè no seì scûggiâ,
E per miacoo seì passâ,
Proseguî o vostro camin,
E se voeì fâ parpaggiêue
Con smaltî tûtte e nissêue,
E veggiette co-i çetroin,
E de ciù piggiâ do fresco,
Andæ presto a San Françesco
Che vendieì finn-a o çestin...
E a-o ritorno a-o cæo da lûnn-a
Poeì trovâ a vostra fortûnn-a
Senza andâ ciù a vende in gio
Ma vegnî ûnn-a Scignoronn-a,
Mette sciù capello... addio,
O Segnô ve-a mande bonn-a.
Stæme allegra, Cattainetta,
Monto in casa, e staggo ammiâ
Dall’Ercûlea Terrassetta
Se vedesse ûn pö passâ
Qualche nêuvo Chittarin
Da sûnn-â[sic] de cose nêuve
Pe-o ventûro Trentenêuve,
Zacchè quello de Martin
O l’è guasto, stanco e frûsto
Pe-o chollerico desgûsto!!...
Scì, Comâ, me manca a lena,
L’estro poetico o l’è andæto
Pe-a gran perdita che ho fæto!!!
....
Lascio Pindo e a mæ Camena,
E anchêu fasso a Ritirata
Da mæ longa Campagnata
De vintiquattranni... addio!
Me congedo da-i corteixi
Mæ Lettoî Foestê e Zeneixi,
Che m’han sempre favorîo
Di so applausi, indegnamente:
Ghe ne son riconoscente,
E ghe daggo ûn bello Addio,
Domandando a tûtti scûsa
Pe-i difetti da mæ Mûsa,
Che chì a taxe... e a l’hà finio.