Piaggio M. - Poesie 1846/Prefazioîn e Reviste da Çittæ/1839
*
L’è zà chi o Primmo dell’anno!...
Vegni, vegni, fatte avanti
Co-a to tûrba d’aspiranti
Pe andâ a dâ o bon Cappodanno...
Movimento generale,
Invexendo artifiziale,
Proccesciôin da tutti i canti
De marscinn-e, e cappottin,
Toghe, späe, ciûmme e galloin...
Complimenti, abbrassamenti,
Strenzitûe de man mordenti,
Baxi, angûrj, ciarle, inchin,
E proteste senza fin,
Che se porta all’aja i venti,
O se perdan per camin...
(Chi è pötron se ne stà in letto,
E sûpplisce ch’ûn biggetto)
Giorno bello e d’argomento
De gûstose osservazioîn,
Ma de serio pensamento,
E de gravi rifflescioîn
Per o nostro disinganno...
Ogni primmo de Zenâ
Che veddemmo capitâ
O n’azzunze in spalla ûn’anno
Coscichè (e non ghe pensemmo)
Sempre ciù s’avvixinemino
All’Eternitæ, e invegimmo!...
Tûtti i anni descrovimmo
Unn-a nêuva rûga io cëa,
Unn-a camoâ in ta dentëa,
L’êuggio che s’indebolisce,
O cavello ch’ingianchisce,
(A despëto de provæ
Selenitiche pommæ
Che doveivan fâ miracoli)
E per queste inevitabili
Nostre ûmane Infermitæ
Gh’è a speranza per l’Etæ,
Gh’è o compenso di Spettacoli
Gh’è i brillanti Carlevæ,
Gh’è a comparsa di nêuvi Abiti,
Gh’è o Cazin, gh’è e Societæ
Dove fra e Ninfette e i Satiri
Regna o sciato e l’allegria,
Se trippûdia, e poi sûnamboli
Ranghezzando se va via!!
Ma noi semmo fortûnæ
De poeì vive ä nostra etæ
Ne-o gran secolo di lûmmi,
De scoverte, e de invenzioîn,
Fra a finezza di costûmmi,
E a stranezza de opinioîn,
Aoa i tempi son megioæ,
No s’ammïa tanto ä sostanza
E se pasce d’apparenza;
Basta aveì lengua e dinæ
Se ven ommi d’importanza,
Se diventa arche de scienza
E galantommoîn perfetti,
O che tempi benedetti!
Aoa e Belle no patiscian
Ciù o sigäro, e o preferiscian
Ai profûmmi e ai fenoggetti....
Son vegnûe de bocca bonn-a,
Ciù e perûcche no e spaventan,
Manco ûn abito ä carlonn-a,
D’ogni cosa se contentan,
Pûrchè seggian novitæ ...
E aoa i ommi son cangiæ
Son farsii de bonn-a fede
Per ... lasciâ ricco l'erede....
Solo e modde!... ma schivemmo
Questo schêuggio feminin
Dove naufraga i borsin
E diventa o Majo scemmo ...
E parlemmo do nêuvo Anno
Che da-e fæte osservazioîn
O doviæ (se no m’inganno)
Ese ûn anno fertiliscimo,
Sorve tûtto abbondantiscimo
D’êujo, pan, pulenta e vin;
De profitto ao bûttegâ,
De risorsa per l’artista,
De coccagna pe-a Modista,
De vignetta pe-o Sensâ,
De fortûnn-a pe-o Mercante
E de stento ao Camallante:
E o passiemo, se a Dio piaxe,
In salûte e santa paxe,
Senza aveì ciù ascadi e puïa
Per l’axiatica spazuia!!!
(Perchè, sempre Dio loudòu
A scentò l’anno passôu);
Ma tranquilli e in allegria
Fra i boin piatti de raviêu,
In geniale compagnia:
Comme v’auguro de coêu,
Gentiliscimi Lettoî,
Che m’ei fæto proseguî
A mæ lunga Campagnata
Reginesca in Ritirata
Grazie äe vostre scimpatie
Verso e patrie mæ Poexie,
Che m’han dæto spinta e lena
D’andâ in Pindo per pregâ
Torna Apollo, e a mæ Camena
D’aggiûttâme ûn pö a grattâ
O desmisso Chittarrin....
Bon prinçipio e megio fin
Daggo a tûtti, e ve dexidero
Primmi d’anni ancon pe ûn secolo
In perfetta sanitæ,
Guägni, scûi e prosperitæ.
E, zacchè me trêuvo in venn-a
Pe-o coraggio che me fæ
Permetteime ûnn-a duzenn-a
D’avvisetti, e augûrj boîn
Ma no femmo applicazioîn.
Prego dunque ai ben mariæ
Gran pazienza e gren dinæ;
Ae mogiê l'onô, a prûdenza,
Bocca a bûscio e compiaxenza,
A saviezza (se se pêu)
E ûbbidienza ne-i Figgiêu;
A Concordia fra i Parenti,
A lealtæ fra i Conoscenti,
E a sccettezza fra i Amixi;
Nisciûn agge ciù Nemixi,
Amô e riconciliazion,
Vadde ao diao co-i sò barbixi
A sûperbia, l'ambizion,
L’odio, l’astio e a prezunsion.
Prego ai ricchi a Caritæ,
E a chi è poveo l'Umiltæ;
All’Avaro e all’Usûrajo
O sovvegno do Santûajo,
O rimorso da conscienza
C’ûn pittin de penitenza;
Prego ai Meghi economia
De lanzette e ciù armonia
De riçette, e a n’inventâ
Ciù scistemi pe.... allûgâ;
Ai Dottoî se me o permettan,
Ghe dexideo da chi avanti
Carestia de Litiganti,
Gren Consûlti, e che pandettan;
Prego ûnion fra Sêuxue e Nêue,
E quest’ûltime a no voeì,
Ciù de primme mai saveì,
Ma passâ per teste vêue,
Sorvetûtto a aveì ciù etæ,
A ese brûtte e desgaibbæ;
Conseggiö quelle Mammonn-e,
Che son zà arrivæ ai sciùscianta,
A fâ sempre da Pupponn-e,
A dî che no n’han quaranta,
E andâ a spazio cö Nevetto
Per fâo credde so Masccetto;
Prego i Zovenotti vegi,
Che vêuan fâ da Damerin,
A stâ sempre avanti ai spegi
Pe attilâse o perûcchin,
E a tiâ sciù ûn punto ae bertelle
Pe no fiaschezzâ co-e Belle;
Prego i vegi Zuvenotti
A taggiâse a barba e i baffi,
E slargâ ûn pö ciù i capotti,
E a n’aveì tornûa da zaffi,
Perchè dunque fan scappâ
Chi vorrieivan vixinâ;
Prego î Servitoî ciù boin
A dî mâ di sò Patroin,
E a no se scordâ o vinetto;
E Camêe ciù predilette,
E che san tegnî o segretto,
A voeì fâ pûbbliçitæ
Di misteri da Toilette;
Prego i Osti de lasciâ
Corrî l'ægua pe-i Muinæ,
I Muinæ a no brennezâ,
Pezâ giûsto i bûtteghæ,
E a no fâ de pastissetti;
Prego ae lingue maldicenti
Di lautiscimi Banchetti
C’ûn pittin de dô de denti;
All’eterno Ciarlattô
Un abbasso de lûnetta
(Per o ben da Societæ)
Redazion d’ûnn-a Gazzetta
All’insigne Seccatô,
(Ma però senza Abbonnæ)
Prego ae Figgie belle e brûtte
(E ghe n’è ûn’infinitæ!)
Un Majetto presto a tûtte
Da poeì giâ Zena a brassetto
Co-a Moffuetta e o Feriolletto
Prego ûnion fra i Letterati,
Pûdicizia a çerti Vati,
Armonia fra i Giornalisti,
Guërre, e paxi ai Novellisti,
Gloria ao Genio, onô a Virtù,
Stûdio e vêuggia ä Zoventù.
Per mi poi, che m’eì sofferto
Per tanti anni, e favorio,
Ve domando ûn nêuvo serto
Da poeì mette torna in gio
Da mæ Mûza inzuvenia
Grazie ä vostra cortexia;
Tanto spero, e tanto attendo,
De tediave chi sospendo,
Ve son scciavo ...... Scignoria.