Piaggio M. - Poesie 1846/Prefazioîn e Reviste da Çittæ/1826
| ←Prefazion, Anno 1825 | Prefazioîn e Reviste da Çittæ de Prefazion, Anno 1826 |
Prefazion, Anno 1827→ |
| (ediçion Pagan - 1846) |
*
Vintiçinque me pa vei
Che ti seggi començôu,
Ma dà lêugo a-o Vintisei
Ch’o l’è chi ch’o t’ha acciappôu,
E co-a lunga so messuïa
O te manda presto via!....
Vanni drito, e no te giâ,
Ma però primma d' andâ
Dimme ûn pö cose ti hæ fæto?
In tant’öe che chi ti hæ stæto,
Êutto mïa (cioè) setteçento
Sciûsciant’ûnn-a, e ciù ûn momento.
Ti hæ levôu mai nisciûn vizio?
A qualcûn misso giûdizio?
Addrissôu gambe a di storti?
Fæto torna vive i morti?....
Ti bæ aggiûttôu ninte i virtuosi?
Astallôu i presuntûosi?
I talenti incoraggïo?
L’impostûa ninte scöxio?...
Ti hæ difeizo l’innocenza
Dä calûnnia e a prepotenza?
Consolôu i povei diäi?
Scortegôu i ûzûrai?
Fæto spende i avaroîn?
Tegnûo in trappa i strallattoîn?
Ti hæ cresciûo i anni a nisciûn?
Manco quelli do Zazzûn!
Ti hæ scassôu forse o milleximo
A de fedi de batteximo?
Perchè a tanti se gh’ammerman
E che a mi no se me ferman!....
Ti bæ lasciôu nisciûn bon spegio
Per spëgiâse e Donne megio?
O ciù d’ûn bon cannocciâle
Per ammiâ i Ommi a-o natûrale?
Ti hæ lasciôu nisciûn indizio
Per fâ e cose con giûdizio,
Senza inganno, nè malizia
Ma in conscienza e con giûstizia?
Cose gh’è?.... ti no rispondi?
Ti m’ammii e ti te confondi?
Ho capïo, o l’è tempo perso.
Vanni e lascia l’Universo....
Vintiçinque addio, ti è morto!!
Vintisei da ti me vorto,
Me sprofondo, e te salûo,
Seggi sempre o ben vegnûo!
Dimme ûn pö per cortexïa
E per mæ consolazion
Cose ti portiæ de bon?
Abbondanza o carestïa?
Paxe o guæra? ... Porto paxe:
Bravo! vegni che te baxe;
Generale? No, lontan
Millemiggia se e schissiän!
Bonn-e fighe! e l’Abbondansa?
In ciù lêughi a scciattapansa,
E in çerti atri a sä bandïa!
Oh!.... ma a Zena no gh’è puïa
Perchè gh’ emmo tanto gran
Che i moscin no se o mangiäin;
Do vin sccetto, e battezzôu,
E tant’êujo in te l’axôu
Da trincâ e da frizze ben.
E l’Inverno aoa che ven
Come sälo? Freido assæ!
Ne stä ben i Pellissæ;
Ne vegniä da neive? Mai.
(Ohimè! Appaltatoî, son guai!)
E a Stæ? Cäda da scciûppâ!
Se vestiemo de tägnâ
Che da-o cädo no se mêue
Basta aveì de parpaggiêue:
Primmaveja e Autûnno comme?
Degni affæto do so nomme.
Burraschette, fûlminetti,
Terremoti, uraganetti
Ne vegniä per fâne grazie?
Quattro càllai.... Mille grazie!
De comete co-a spassoïa,
Do baixin de qualche pria
Ne veddiemo?.... Ah ti no senti?
Ma lasciemmo i Elementi
Dimme ûn pö se travaggiemo
In Commercio, e se guagniemo?
Se se fä di affari in grande?
Se tappiemo dove spande?
Se l’indûstria e a temperanza
Viviän sempre de speranza?
Se l'inzegno co-a pazienza
Campiän sempre d’astinenza?
O vegniä o quarto de lûnn-a
Pe acciappâ o sûffo ä fortûnn-a
Comme fan tanti intrigoîn;
Ghe n’ aviemo di Arpagoîn
Co-a miseja inesorabili,
Che viviän da miserabili
Per moî ricchi, e per levâ
I so eredi da pregâ?
No sä miga dicciarôu
Per spiritoso o sfrontôu?
E de tûtto intelligente
Chi è de tûtto maldicente?
Dimme ûn pö per cûxitæ
E pixioîn sän ciù montæ?
E e grondann-e han da restâ
Sempre all’aja per bagnâ?
E fâ giastemmâ e personn-e!
Ghe ne sä de bänçe bonn-e?
Meze canne non çimmæ?
Ammoe giûste, e ben marchæ?
Ti no gh’æ miga di Meghi
Boîn pe-i Farmacisti e i Ceghi?
Di Chirûrghi per fâ fâ
Qualche gamba da-o bancâ?
Di Legali fæti apposta
Per no dâ mai de risposta
O fâ perde e bonn-e liti?
E di Colli-storti driti
Che spacciandose pe amixi
Son ciù pezo che i nemixi,
Dio ne guarde! ghe ne sä!
Ciarlatten ne capitiä
Con Diplomi da Oculista
Per levâ o resto da vista!
Di Dentisti meislri d’ascia
Pe arrancâ dente e ganascia!
Segrettisti per serrâ
A podraga in t’ûn stivâ!
Cabalisti ben despeæ
Per fA fA a-i atri dinæ?...
Ghe n’aviemo Epidemie?
St’anno e solite maottie
Con che nomme se ciammiän?
Con che sûccao ne pûrghiän?
Che rimedio sä adottôu?
Chêutto, crûo? cado, o giassôu?
S’attastiä o pöso co-e die?
Ho capïo, te veddo rie
O sä ûn Anno d’Abbondanza,
De Progetti, de Speranza,
De Salûte, de Dinæ,
D’Ommi ben, e mâ majæ,
Che con ninte se viviä,
E per poco se moiä;
Ma noî atri brava Gente
Se a passiemo allegramente
E fin tanto che pittemmo
Stæ segûi che no creppemmo;
Do restante no m’intrigo,
Staggo a vedde, e me bäsigo,
Un atr’anno ne parliemo,
Stæme allegri, se veddiemo.