Piaggio M. - Poesie 1846/Esopo Zeneize/O Zûgôu
FOA LXXXI.
I zêughi de commercio fra amixi e per demöa,
D’inverno, ä seja, in casa son boîn per passâ l'öa;
Ma quelli de fortûnn-a son sempre da proibîse
In casa e fêua de casa a costo d'addormîse;
Zûgâ poi da tûtt’öe con tûtti, e gren dinæ,
O l’è ûn cattivo vizio, pericoloso assæ;
Se ven a poco a poco zûgoeì de profescion,
Se pensa solo a-o guägno chi è ûnn-a gran tentazion,
Perchè n’è coscì façile, comme se pensa, o stâ
A-o zêugo galantommi, e voeì sempre guägnâ;
Se pêu ben ëse bravi, aveì edûcazion,
Dinæ, delicatezza, contegno, precision,
Ma pe-o ciù se prinçipia pe ëse galantommoîn,
E se finisce sempre per diventâ birboîn!...
O zêugo, figgi cäi, d’azzardo o no conven
A-o ricco, manco a-o poveo, nè in te case o sta ben,
Perchè diventan lögie, bordelli, preçipizii,
Dove ghe nasce e vegeta cö zêugo tûtti i vizii.
Quante famiggie mai son stæte rovinæ
Pe-o zêugo, e malediscian per sempre e carte e i dæ!
Quanti spëgi s’è visto! sentimmo raccontâ
Chi s’è appiccôu pe-o zêugo, chi s'è andæto a negâ!
Chi s’è bandïo dä patria, chi è stæto imprexonôu!
Fûneste conseguenze da vitta do zûgôu!
Che vive poi ch’o fa!... o l’è ûn continuo moî!
Fra o timô e fra a speranza, o dexideâ e o patî;
Sempre penoso, inquieto, pallido, e masche tiæ,
Co-a tarantella a-e brasse, e i ungie roziggiæ;
I êuggi sempre in gïo, mai fermo in sciä carëga,
Un pö o giastemma Cristo, da lì a ün momento ö prega;
O baxa aoa ûnn-a carta, o rie, da lì a ûn pittin
L’addenta, sguära o masso; e rompe o tavolin;
Se o perde o l'è ûnn-a furia, se o guägna o se lamenta,
Che ghe pâ poco o guägno, de tûtto o s’impazienta;
Da nêutte o ne fa giorno, pizaggia per mez’öa,
Sempre co-a bocca amaa, mangia poco e divöa;
Sûccido de giancaja, vestî pe-o ciù sguarrôu,
Co-a barba meza fæta, sempre despëtenôu;
Fantin insopportabile, se o l’ha moggiê e figgiêu,
No ghe sovvegnan manco, solo o l’ha o zêugo in coêu;
Tiranno de lê mæximo, chè a forza de zûgâ
Perde i dinæ e a salûte, e va a finî all’ûspiâ!...
Questo o non è o ritræto, ma un sbosso, ûnn-a maccietta
Di Professoî do Goffo, di Dæ, Maccâ e Bascietta.
Tegnîvelo a memoja, se voeì zûgâ, figgiêu,
Gh’ei l’Oca, l'Ambo, o Zielo, ma sempre de pignêu.
