Piaggio M. - Poesie 1846/Esopo Zeneize/A Ciossa, i Pollin, e Figgie e a Governante

Da Wikivivàgna
Esopo Zeneize de Martin Piaggio
A Ciossa, i Pollin, e Figgie e a Governante
[p. 137 modifica]
FOA LXXXII.


A CIOSSA, I POLLIN

E FIGGIE E A GOVERNANTE.

Unn-a votta in t’ûn giardin
Gh’ ëa ûnn-a Ciossa co-i Pollin
Sparpaggiæ de fêua do nïo,
Che gh’andavan tûtti in gïo
A raspâ dov’a raspava,
A pittâ dov’a pittava,

[p. 138 modifica]

Dove lê o becco a frettâse,
Comme lê a spellissonâse,
Sempre attenti a contraffâla,
Sempre in moto a fâghe festa
Con pittâghe e sampe e a cresta
Comme in segno de baxâla,
E sätâghe per demöa
In scë spalle, o derrê ä cöa,
Sotto ûnn’anca poi ficcâse
Per stâ a-o cädo, e addormentâse,
Tûtti allegri poi sciortî
Per scorrîse, e criâ pî-pî.

Questa Ciossa, brava Moæ,
Insegnando a tûtte e moæ
A voeì ben a-i so figgiêu,
Se lasciava fâ de tûtto,
Ma co-i êuggi e con o coêu
A i seguiva da per tûtto,
Che se ûn pö ciû lonxi andavan
A i ciammava, e lö tornavan.

Gh’ea due Figgie da ûn barcon,
Che façeivan colazion
C’ûnn-a vegia Governante,
Donna brava , e vigilante;
Se sciallavan de stâ a miâ
Quella Ciossa co-i Pollin,
Ghe cacciavan da mangiâ
Do beschêutto ogni pittin,
Che a Moæ presto a menissava,
E a pittâlo a gh’insegnava
Con lasciâgheo tûtto a lô.

[p. 139 modifica]

Questo vëo træto d’amô
O stûppì quelle due Sêu ,
Che dixeivan mäveggiæ:
Ma che brava, e bonn-a Moæ!
Cos’a fa pe-i so figgiêu!
Ghe cacciavan sempre pan,
E di gren baxin co-a man.

I Pollin frattanto andando
In sà e in là sempre pittando,
Con scorrîse, e fà ûn pö o matto,
Se trovòn lonten da-o nïo,
Scrovìn tûtt’assemme ûn Gatto
Chi vegniva zù d’asbrïo
Co-i mostasci e i denti affiæ,
Giòn de bordo in t’ûn momento
E corrindo comme o scento
Andòn presto da so moæ
Che meschinn-a a palpitava,
E in to nïo a i aspëttava
Con i äe tûtte allarghæ,
A i ascose, e a s’ accucciò;
Vegnì o Gatto, o no i trovò,
E o piggiò ancon de becchæ!....

Ma che brava Moæ davveì!
(Replicòn quelle due Sêu)
Cos’a fa pe-i so figgiêu!

Eì raxon, ma anchêu imprendeì
(Disse a Vëgia) e da-i Pollin
E dä Ciossa, e da-o Minin,
D’amâ sempre e d’ûbbidî
Chi v’ha dæto l'existenza,
De stâ in casa, e no sciortî,

[p. 140 modifica]

E sciortindo aveì prûdenza
Perchè o Mondo è biricchin;
Se qualcûn poi ve çercasse,
Corrî sûbito in te brasse
Da Mammà comme i pollin;
Ma, mæ cäe, no ve stacchæ
Mai da-i fianchi d’ûnn-a Moæ.