Piaggio M. - Poesie 1846/Esopo Zeneize/O Roscignêu e o Cûcco

Da Wikivivàgna
Sâta a-a navegaçión Sâta a-a çèrchia
Esopo Zeneize de Martin Piaggio
O Roscignêu e o Cûcco
[p. 59 modifica]

FOA XXXII.


O ROSCIGNÊU E O CUCCO.


Là da-i tempi che se sente
Començâ a Canson di grilli,
E che o mûxico de mazzo
Fa gran pompa di so trilli;

Che se vedde a vista d’êuggio
In sci proeì cresce i erbette,
E se sente imbalsamâ
Dall’odô de mille scioette;

Che montando i bæ pe-i bricchi
Fan co-e pegoe l’axillin,
E risêunna o campo e o bosco
Da-i conçerti di oxellin;

In t’ûn scito de collinn-a,
Pin de frasche, e tûtto erboetti
Se sentiva o bello canto
Do ciù bravo di oxelletti;

Çerte notte acûte e basse
D’ûn voxin chi tocca o coêu,
Çerti trilli e barbacii,
Che no i fa che o Roscignêu.

E o l’ëa giûsto appunto lê
Chi cantava coscì ben,
Che a sentîo co-a bocca averta
Gh’ëa lì ûn mûggio de villen;

In sci erboi pin d’oxelli,
Sotto poi tanti animæ,
Finn-a ûn aze co-e scarbasse,
A stâ lì co-i oeggie affiæ.

[p. 60 modifica]


Stavan tûtti scilenziosi,
Se sentiva intanto intanto
Solo o Cûcco cö so lûo
Distûrbâ scì bello canto;

E o l’andò tanto sbraggiando
Co-a so voxe destonnâ,
Che o Cantô di boschi stûffo
O no vosse ciù cantâ.

Picco o Cûcco allöa fè ûn sghêuo,
E corrindo ciù ch’o pêu,
O s’andò a pösâ sûperbo
Ben d’appresso a-o Roscignêu,

E o ghe disse in aja grave,
E con ton de compiaxenza:
Ma ti o sæ, che semmo bravi!
Che cantemmo pe eccellenza.

In sentî tanta arroganza,
Stuppefæti i animæ
Fen ûn sgrêuxo forte a-o Cûcco,
E o piggiòn tûtti a fischiæ.

L’ignorante e l'impûdente
De mescciâse han sempre l’arte
Con chi è bravo pe ëse a parte
De so glorie, e fâ o sapiente;
Ma ghe scappa çerti lûi
Che son presto conosciûi.


Piaggio.46-8.gif