Piaggio M. - Poesie 1846/Esopo Zeneize/O Cavallo Ministro
| ←O Roscignêu e o Cûcco | Esopo Zeneize de O Cavallo Ministro |
A Crava e a Pegoa→ |
FOA XXXIII.
Quando e Bestie se piccavan
D’ëse giûste, e raxonnavan
Comme i Ommi ciù assennæ;
No so ciù in te che çittæ,
Sotto o regno fortûnnôu
De Leon primmo tanto ammôu
Un belliscimo Cavallo,
Fedeliscimo vassallo,
Ancon ben de fresca etæ,
Pe-a so grande abilitæ
O fù eletto da-o Regnante
So Ministro, e Governante.
Questa cosa a ghe fè onô,
E pe-o paize o fè fûrô:
Basta dî che ogni Animâ
Se gh’andava a rallegrâ,
Fava parli ognûn de lê,
Con portâlo a-i sette Çê,
E de seja, e de mattin
O gh’aveiva in casa pin,
Aoa l’Aze chi o leccava,
Aoa o Bêu chi l’adulava,
Gatti, Chen, Lovi affammæ,
Tigri e Vorpi in quantitæ;
Tûtti i giorni senza fallo
Gh’ëa cöcagna da-o Cavallo;
Se mangiava, se beveiva,
E nisciûn ninte spendeiva.
O Cavallo o se sciallava,
Che de coêu ste cose o fava;
Ma fortûnn-a chi è incostante,
A o levò da governante,
E per causa d’ ûn bûffon
O cazzè in disgrazia a-o Leon,
O perdè l’impiego, e ûn Lô
O fù eletto a tanto onô
E li sûbito i so amixi,
Diventòn tûtti nemixi;
Chi o passava pe ignorante,
Chi dixeiva, o l’è ûn birbante,
E de tanti ch’o n’aveiva,
Manco l’Aze ö difendeiva,
Anzi i ciù benefichæ
Diventòn nemixi zûæ.
Povea bestia de Cavallo!
Per calûnnia cheito in fallo,
No trovando ûn gatto, ûn can
Chi ghe desse ûn pö de pan,
O finì per porze a sampa
Coscì vedde anchêu chi campa:
Fin che l'Ommo ha di dinæ,
O l'ha amixi in quantitæ,
Se per caxo o ven despeôu,
Scentan tûtti, e o l'è schivôu.
