Piaggio M. - Poesie 1846/Esopo Zeneize/A Rondaninn-a e i Oxelletti

Da Wikivivàgna
Esopo Zeneize de Martin Piaggio
A Rondaninn-a e i Oxelletti
[p. 57 modifica]
FOA XXXI.

A RONDANINN-A E I OXELLETTI.


Unn-a votta a Rondaninn-a,
Quando o lin se semmenava,
A l’andò da-i Oxelletti,
Per so ben a i conseggiava
De pittâ tûtta a semenza,
Ma nisciûn ghe dè creddenza.

Doppo dexe, o duzze giorni,
Nascè o lin, da lô a tornò,
De mangiâlo, o de guastâlo
Nêuvamente a i conseggiò;
Ma nisciûn ghe desse mente,
E a ciammòn impertinente;

[p. 58 modifica]


A l’andò torna da lô
Quando o lin o matûrava:
Figgi cäi, guastælo presto,
Descciantælo, a ghe sbraggiava,
Ve l’ho dito zà træ votte....
Ma ciù ûn pö ghe dan de botte;

A scappò da quelli allöa,
E dall’ommo a se n’andò,
A o pregò da so amicizia,
E con questo a pattezzò
De fâ o nïo per primma baze
Sotto i teiti de so caze;

Quando o lin fù raccûggeito,
Se fè o spago e a terragninn-a;
ln to nïo stava segûa
Co-i so figgi a Rondaninn-a,
Ma co-i roccoli e i sorchetti
Fûn piggiæ quelli Oxelletti.

Questa Foetta a l'è adattâ
Per quelli ommi testardoîn,
Che no san mai profittâ
Di conseggi e di paeì boîn;
Fan e cose de capriçio,
Senza testa, nè giûdizio,
Coscì van presto in mallöa,
E s’accorzan solo allöa
D’ëse stæti axi e testardi,
Se ne pentan, ma l'è tardi.