Piaggio M. - Poesie 1846/Esopo Zeneize/O Rætin

Da Wikivivàgna
Sâta a-a navegaçión Sâta a-a çèrchia
Esopo Zeneize de Martin Piaggio
O Rætin
[p. 25 modifica]

FOA IX.


O RÆTIN.


Un sî-sî de Rætin,
De quelli ben piccin,
Un giorno, ch’o passò
Da ûn lago, o se spëgiò,
E in vedde e so ciûmminn-e
Con tante pittettinn-e,
O disse: m’assomeggio
Per bacco! e son pareggio
Quæxi d’ûnn-a Beccassa;
Lê a l’è ciù grande e grassa,
A l’ha o becco ciù longo,
Ma mi ghe rimediö,
Mangiö, e beviö de longo,
E comme lê vegniö,
Allöa porriö çercâ
L’ombrigo sotto tæra,
Porriö a-e lûmasse fâ,
A-i grilli, e a-e gatte guæra;
Andiö pe-i monti, e a-o cian,
Porriö rivalizzâ
Co-a pernixe e o faxan,
E cose staggo a fâ?...

O sciollo o raxonnava
Coscì, ma o delirava;
Sûbito o prinçipiò
A dâse ben d’attorno,
E tanto o s’ingösciò
Mangiando nêutte e giorno,

[p. 26 modifica]

Che o pesso de mincion
O moì d’indigestion.

O quanta Gente cazze in basso stato
Solo per ambizion
De voeì stâ a paragon
Di ricchi, e senza ciûmme sghêuâ tropp’äto!


Piaggio46-2.gif