Piaggio M. - Poesie 1846/Esopo Zeneize/A Sigaa e o Grillo
| ←A Crava e o Lô | Esopo Zeneize de A Sigaa e o Grillo |
O Rætin→ |
L’ëa do meize là de Stæ,
Quando o Sô co-e rêue affoghæ,
E brûxando ciù ûn tisson,
O va a villezzâ da-o Leon,
Che ûnn-a sciolla de Sigaa
A cantò senza grattâa
Tûtto o giorno con frusciâ
Co-a so voxe destonnâ
Tanti Insetti so vexin;
Finalmente a desse fin
Aa so mûxica arraggiâ
Quando o Sô se cacciò in mâ:
Sciortì allöa dä so tannetta
Un Grilletto, e o prinçipiò
A cantâ a so cansonetta
Comme a moddo de Rondò,
Ch’o no a voeiva ciù finî:
A Sigaa, chi aveiva vêuggia,
Perchè stanca, de dormî,
A s’avansa da ûnn-a fêuggia,
E a ghe dixe in ton ardïo:
E coscì! ti hæ ancon finïo,
Brûtto insetto, de cantâ?
Chi nisciûn pêu ciù quetâ!
Se ti avesci comme a mæ
Unn-a voxe bella assæ,
Te soffrieivo, ma in sentî
Sempre fâ grigrî-grigrî,
Tanta raggia ti me metti,
Che te fæivo in menissetti:
Taxi dunque, e n’insordî
Chi ha bezêugno de dormî.
Ghe rispose o Grillo: caa,
Fa o piaxeì, no t’arraggiâ,
Mi no so se o mæ cantâ
O l’arrive a-o to, Sigaa,
Ma pe-o gûsto e l’armonïa
A l’è a stessa scinfonïa;
Tûtto o giorno ti hæ cantôu
Senza mai piggiâ respïo,
Che ti m’hæ quæxi insordïo
T’ho sofferto, e n’ho parlôu
Se aoa canto ûn pittin mi,
Taxi dunque, e soffri ti.
A-o mondo quanta gente
Pretende impunemente
O Proscimo seccâ
Co-i fæti e cö parlâ,
E lô no vêuan soffrî
Nisciûn nè fâ , nè dî!
