Piaggio M. - Poesie 1846/Esopo Zeneize/A Crava e o Lô

Da Wikivivàgna
Esopo Zeneize de Martin Piaggio
A Crava e o Lô
[p. 22 modifica]
FOA VII.


A CRAVA E O LÔ.


Unn-a Crava voendo andâ
In t’ûn bosco a pascolâ,
A lasciò in casa serrâ
Unn-a so Figgia;

E a ghe disse in to sciortî:
A nisciûn, avverti, arvî,
Chè porrieiva o Lô vegnî,
Dunque o te piggia;

Da lì a ûn pö, che a se n’andò,
Passò o Lô, ä porta o piccò:
Chi gh’è? a disse... Amixi! o criò,
Con fâ da bæ;

Ma a Cravetta prevegnûa,
D’arvî a porta a no se cûa,
A l’aggueita dä fissûa
Per cûxitæ;

A descrêuve un Lô chi ammïa,
A tremmava un pö dä puïa,
Ma a ghe disse: «Lô, va via,
Che ti ê scoverto.»

Allöa o Lô rispose: «Brava!
Questa chi no l’aspëtava;
Vaddo, ma t’aspëto, Crava,
In to deserto.»

Eive chì cose vêu dî,
Belle Figgie, d’eseguî.
Cose dixe so Mammà:
Chi obbedisce mâ non fa:
Se a Cravetta a-o Lô a l'arviva,
Povea lê! o se a mangia viva.