Piaggio M. - Poesie 1846/Esopo Zeneize/O Gatto Maimon e a Scimia

Da Wikivivàgna
Sâta a-a navegaçión Sâta a-a çèrchia
Esopo Zeneize de Martin Piaggio
O Gatto Maimon e a Scimia
[p. 21 modifica]
FOA VI.



O GATTO MAIMON E A SCIMIA.

Un Gatto maimon zoveno
Un giorno o destaccò
Unn-a noxe dall’erboo,
E in bocca o se a cacciò;

Sentindola aspra e dûa,
O sbraggia inveninôu:
Me disse, che ti ê bonn-a
Mæ Poæ, ma o m’ha ingannôu;

Andæ ûn pö a credde a-i Vegi!
Questa a l’è ûnn-a treitoïa;
Vanni, frûto do diavo,
E a noxe o cacciò via;

Se l’acciappò ûnn-a Scimia,
Con stento a ghe levò
E scorse, e ben mondâ
In bocca a se a cacciò:

Che gûsto! (a criò mangiandola)
Oh che savô mai bon!
Scûzime, Gatto cäo,
To Poæ aveiva raxon;

A noxe a l'è ûn bon frûto,
Ma primma de mangiâla
Bezêugna arvîghe a scorsa,
Sciaccâla, e poi mondâla;

E ti no sæ, pötron!
Che a-o mondo per mangiâ
Guägnâselo bezêugna
Primma con travaggiâ?