Piaggio M. - Poesie 1846/Esopo Zeneize/O Pavon e o Roscignêu

Da Wikivivàgna
Sâta a-a navegaçión Sâta a-a çèrchia
Esopo Zeneize de Martin Piaggio
O Pavon e o Roscignêu
[p. 132 modifica]

FOA LXXVIII.


O PAVON E O ROSCIGNÊU.


O Cavallo do cäro de Giûnon,
O figgio d’Argo, vêuggio dî o Pavon,
Inarcandose a cöa,
Façendo da scignöa,
O disse a ûn Roscignêu chi o stava a miâ:
Ebben, cose te pâ?
Ti hæ mai visto da mæ ciûmme ciù belle
Lûxenti comme e stelle,
Fæte d’argento e d’öu, ricche de tanti
Rûbin, smeraldi, zàffiri e diamanti?
Chi ælo chi no stûpisce
Ammïando e mæ bellesse?
E chi no sbalordisce
In vedde insemme ûnïe tante ricchesse?
Oh poveo Roscignêu, gamba sottî!
Ti è ben da compatî!

[p. 133 modifica]

Coscì brûtto e piccin, a to brûttessa
A dà sempre ciù spicco ä mæ bellessa!
Vatt’asconde in t’ûn canto per caitæ
Che ti me fæ pietæ!

O Mûxico di Boschi non cûrando
L’orgoglioso linguaggio do Pavon ,
Ghe stava sempre e brûtte sampe ammïando
In aja de desprexo e compascion,
E poi, per vendicâse dell’oltraggio
Fæto a-o so Personaggio,
Ghe bastò d’arvî a bocca per cantâ,
Che o Pavon scappò via co-a cöa serrâ.


Piaggio.46-5.gif