Piaggio M. - Poesie 1846/Esopo Zeneize/E due porte e o Vento

by Martin Piaggio

←A Carrossa

Esopo Zeneize de Martin Piaggio E due porte e o Vento

O Pavon e o Roscignêu→

FOA LXXVII.

E DUE PORTE E O VENTO.

Se levò ûn giorno ûn vento coscì forte
Che in t’ûnn-a stanza o spalancò due porte,
E quæ sbatteivan con fâ tanto sciato,
Che distûrbavan tûtto o vexinato;
E picca... e pesta... e sbatti... finalmente
Unn-a restò serrâ; ciù non se sente
Sciato nisciûn, sebben sciûsciasse o vento.

Oh voî gente majâ, piggiæ argomento
Da queste porte, quando rattellæ
Mai ciù a finieì, se tûtti dui sbraggiæ;

Voî, donne, castighæ a lenguetta affiâ,
Comme a porta tegnî a bocca serrâ,
Lasciæ ben sbatte l’atra, se taxieì
A se serriä lê ascì, coscì a finieì.

A raggia a l'è ûn vapô, che remennôu
O fa lampo, ma o mêue se soffocôu.