Piaggio M. - Poesie 1846/Esopo Zeneize/O Pastô e o Gïasô
| ←O Can Mastin e o Gatto Bardo | Esopo Zeneize de O Pastô e o Gïasô |
I Oxelletti e o Rocolo→ |
Un Pastô — disse a ûn Gïasô:
Vorriæ ûn pö o perchè saveì,
Per piaxeì,
Ti gii sempre a faccia a-o Sô?
Ammïo o Sô — disse a-o Pastô,
Perchè o creddo mæ doveì,
E per voeì
Dâghe ûn segno do mæ amô;
Senza lê — no staeivo in pê,
Vivo e bello o me manten,
Me sosten
Perchè vadde drito a-o Çê;
Se ti n’è — ingrato, o messê,
A chi te dà vitta e ben,
Alza ben
Ti ascì a testa, e striscia i pê.
Imparemmo da-o Gïasô
A no se scordâ o Segnô.
