Piaggio M. - Poesie 1846/Esopo Zeneize/I Oxelletti e o Rocolo

Da Wikivivàgna
Sâta a-a navegaçión Sâta a-a çèrchia
Esopo Zeneize de Martin Piaggio
I Oxelletti e o Rocolo
[p. 143 modifica]
FOA LXXXVI.


I OXELLETTI E O ROCCOLO.


Çerti Oxelletti — voeivan andâ
Verso a montagna — aja a cangiâ;

[p. 144 modifica]

Ma da ûn boschetto — passâ doveivan,
Dove ûn gran roccolo — teizo veddeivan.
Andò a provâse — ciù d’ûn ardïo,
Ma con restâghe — se n’è pentïo.
Doppo aveì fæto — gren conseggetti,
Disse o ciù vegio — fra i Oxelletti;
« Reste proibïo — soli passâghe,
« E manco a sciammi — de pochi andâghe,
« Ma ûscimmo tûtti — a ûn tempo stesso
« Formiemo ûn popolo — d’oxelli spesso;
« Essendo unii — ciù forza aviëmo,
« Moïemo tûtti, — o tûtti andiëmo.
E dito e fæto, — piggiòn d’asbrïo
Tûtti ûn gran sghêuo — diretto e ûnïo,
E con quell’impeto — a ræ strassòn
E verso i monti — allegri andòn.

Beneite e beneixïe
Quelle famiggie ûnïe
Che saviän fâ coscì!