Piaggio M. - Poesie 1846/Esopo Zeneize/O Can Mastin e o Gatto Bardo
| ←L'Ommo, a Sûcca e e Giande | Esopo Zeneize de O Can Mastin e o Gatto Bardo |
O Pastô e o Gïasô→ |
FOA LXXXIV.
Stanchi ûn giorno i Gatti e i Chen
De fa guæra fra de lô,
D’ëse amixi risolvèn
Per stâ sempre in paxe e amô.
Fù conclûso ûn armistizio,
Primma i patti se fissò
Da due bestie de giûdizio,
Poi a paxe se firmò.
Fæta a paxe, ûn Can mastin,
Ciù feroce che ûn Leopardo,
Promotô d’odio e questioîn,
O l'andò da ûn Gatto bardo,
E con aja de baxâo
O se misse allegro a dîghe:
Damme a sampa, amigo cäo,
No ciù gnæra, bonn-e fighe!
I nostri odii son finii,
Nè mai ciù s’emmo da dâ,
Da-i trattati garantii
Ogni puïa è terminâ;
No stâ dunque a ëse ciù armôu
De quell’ungie coscì affiæ,
Che m’han sempre granfignôu,
Ti fæ ben, se ti è* taggiæ.
« Acconsento (disse o Gatto)
« A-i to boîn sûggerimenti,
« Ma ti ascì, con questo patto,
« D’arrancâte primma i denti.
Di nemixi zà provæ
I conseggi n’eseguî,
De so frasche no ve fiæ
Per n’aveìvene a pentî.
