Piaggio M. - Poesie 1846/Esopo Zeneize/O Gatto e i Ratti

Da Wikivivàgna
Sâta a-a navegaçión Sâta a-a çèrchia
Esopo Zeneize de Martin Piaggio
O Gatto e i Ratti
[p. 35 modifica]

FOA XVI.


O GATTO E I RATTI.


Un bello Gatto gianco veo d’Angòla,
Amoroso e paccion,
Pin de frasche e caezon,
Chi stava sempre in scöso da Padronn-a,
O sorve ûnn-a pötronn-a,
Moscio, perchè o mangiava
De cose delichæ,
Beschêuttin, e zunchæ,
Coscicchè a-i Ratti a guæra ciù o no fava;
E i Ratti conoscendo a perfezion
Quello Gatto per moscio, e per pötron,
Senza nisciûnn-a puïa passeggiavan
Pe-a casa, e cose voeivan roziggiavan.

L’Angöla ûn giorno doppo aveì mangiôu
Ciù do solito o se n’andò a dormî
Solo in despensa, e ghe restò serrôu;
No ghe tardò a vegnî
Di belli Ratti a roziggiâ o prezûtto,
Formaggio, carne, pan, e ûn pö de tûtto;

E vedendo l'Angöla lì arëlôu,
Che quæxi o no respïa,

[p. 36 modifica]

Sûbito s’han stimmôu
D’aveìghe misso puïa.

Un Ratto allöa ciù spacchetton e ardïo
O disse mâ di Gatti,
Tûtti g’han applaudïo,
E Generale o proclamòn di Ratti;

O monta sorve un fiasco a predicâ:
« Vendichemmose (o dixe) bravi amixi,
« Che semmo stanchi e stûffi de mangiâ
« Sempre di avanzi di nostri nemixi:
« Zûemmo aoa tûtti quanti
« De mangiâ da chì avanti
« Di Gatti solo, che son eccellenti,
« Fæti pe-i nostri denti,
« Mi o zûo pe-o primmo!., e i atri... tûtti o zûemmo:
« Dunque da questo Gatto prinçipiemmo.

A vedde quell’armâ
De Ratti presto andâ
Contro l’Angöla, e dâghe ûn grande assäto, Metteivan proprio puïa.... A quello sciäto
O Gatto s’addesciò,
Sûbito o ghe buffò
E co-e ungie, e co-i denti in t’ ûn momento
O fesse in pezzi quello reggimento,
Meno quattro sordatti,
Che scappavan, sbraggiando, granfignæ:

Mai ciù addesciemmo Gatti:
Che dorman, n’emmo assæ:
Ah! no bezêugna provocâ i nemixi
Quando ne stan amixi:
Sciolli che semmo stæti! Ben ne sta,
Chi a-o mondo tûtto vêu, perde quanto ha.