Piaggio M. - Poesie 1846/Esopo Zeneize/O Cöu e a Farfalla
| ←O Gatto e i Ratti | Esopo Zeneize de O Cöu e a Farfalla |
O Can e o Gatto→ |
Unn-a Farfalla bella,
Lûxente ciù che l’öu,
Sentindose appetitto
A se pösò sc’ûn cöu;
Ma in to sûssâghe e fêuggie,
Come angosciâ, a sbraggiò:
Ohimè! che odô cattivo!
Che savô brûtto! ohibò!
A questo complimento,
Ghe disse o Cöu piccôu,
Farfalla, ti ê vegnûa
D’un gûsto delicôu!
T’ho conosciûo piccinn-a
Non coscì ben montâ,
Quando ûnn-a gatta ti ëi
Te davo da mangiâ;
Oh comme ti gûstavi
Allöa tûtte e mæ fêuggie!
Ma de cangiâ de stato
Ti hæ ascì cangiôu de vêuggie;
Vattene, sconoscente,
Ma no te stâ a scordâ;
Che ûn giorno ti porriësci
Ancon Gatta tornâ.
O voî, che anchêu per caxo
Seì ricchi ciù che vëi,
N’alsæ tanto de naso,
Arregordæve chi ëi,
E a chi seì obblighæ
Ingrati no seggæ.