Piaggio M. - Poesie 1846/Esopo Zeneize/O Can e o Gatto
| ←O Cöu e a Farfalla | Esopo Zeneize de O Can e o Gatto |
A Mosca e o Bêu→ |
Parlo ancon di tempi antighi,
Che dixeiva mæ Bezava,
Quando Berta a-o fêugo a fiava
E parlava i Animæ;
Tempi belli, tempi d’öu,
Che viveiva in paxe e amô
L’Orso e l’Aze, o Can cö Lô,
E che o Leon leccava o Bæ.
Ne-a çittæ de Scimianopoli,
Dove nasce i vei Macacchi,
E che e Scimie van co-i tacchi
Per toccâ co-a testa o Sô:
Gh’ëa ûnn-a votta ûn Can barbin
Cö ciù bello Rodilardo,
Vêuggio dî c’ûn Gatto bardo,
Amixissimi tra lô.
S’inzegnavan trafficando
I talenti in societæ,
E spartivan per meitæ
Tûtti i guägni da giornâ;
Vegnì ûn giorno che o Barbin
Cö so socio di barbixi
Arrobòn da bravi amixi
Un prezûtto a-o Formaggiâ.
Da-o piaxeì se perleccavan
Annastando a preiza bella,
Ma successe ûnn-a rattella
Ne-o dividio fra de lô,
Perché o Gatto pretendeiva,
Che o so socio in to spartïo
O se foise lê servïo
D’ûnn-a doze ûn pö maggiô;
Ëan zà lì per fâ barûffa,
Che se tratta de leccaja;
Un fa gnäo, l’atro ghe baja,
Arraggiæ pezo che ûn Leon;
Ma passâ poi tanta raggia,
Rodilardo con malizia
O portò o Can per giûstizia,
Voendo fâse fâ raxon.
Andòn dunque in Tribunale
Co-i so pessi de prezûtto,
Ben d’accordo in dîghe tûtto
(Non d’aveìli zà arrobæ).
Gh’ëa per Giûdiçe ûn Macacco
Con speggetti e lasagnette,
Gran perrûcca, e due bänsette
Lì d’avanti a lê pösæ;
Doppo inteizo e l’ûn, e l’atro,
O ghe disse serio e brûtto:
Dæme in sà quello prezûtto,
E o parlò pe ûnn’öa latin;
Poi piggiando in aja grave
Drito in pê e bänsette in man,
O i pezò, e quello do Can
O cresceiva ûn stissinin;
Presto presto co-i so denti
Giûdiziosi o n’addentò
Un tocchetto, e o ripezò,
Ma l'ëa ciù quell’atro assæ;
O piggiò quello do Gatto
Con pazienza, e attentamente
O ghe dè gûstosamente
Quattro o çinque roziggiæ;
Ma mettendoo in scë bänsette
O calava mezo gran,
O piggiò quello do Can
E de nêuvo ö roziggiò;
Ma successe a stessa istoja
De mancanza in to pezâo,
Che l’ ëa ciù quello do Gnao,
Che de nêuvo o remondò;
E pezando e ripezando
Senza inganno, nè malizia,
Sempre in linea de giûstizia,
Tûtta a porpa o se mangiò;
Ghe restò in sciä fin di fæti
Un pâ d’osse nette in man,
Che ûn a-o Gatto, l’atro a-o Can
Legalmente o consegnò,
Pronunziando sta sentenza:
« Ti Bôu-bôu, e ti co-i barbixi,
« Diventieì duî gren nemixi
« Sempre di osse roziggieì.
Oh voi atri Galantommi!
S’eì qualcosa da spartî,
Aggiûstæve fra de voî
Senza aveì da litigâ;
Perchè a forza de Sentenze,
De Dottoî, Scriven, Procûoeì,
C’un pâ d’osse in man restieì
Senza poeìle roziggiâ.