Piaggio M. - Poesie 1846/Esopo Zeneize/O Falchetto e a Formigoa
| ←O Leon e o Ratto | Esopo Zeneize de O Falchetto e a Formigoa |
O Lô e a Grûa→ |
FOA XXXVI.
O FALCHETTO E A FORMIGOA.
Un giorno gh’ ëa ûn Falchetto
A beive in t’ûn laghetto,
Ghe va ûnn-a Formigoinn-a
A beive, ma meschinn-a!
L’ægua a se a porta via:
A l'ëa lì per negâ,
O Falchetto l'ammïa,
Caitæ! ghe ne fa mâ,
O piggia ûnn-a fêugginn-a,
E a caccia in to laghetto,
Quella a se gh’arrampinn-a,
E comme in t’ûn gossetto
Navegando a l’arriva
A salvamento ä riva,
E a vedde lì ûn Cacciôu
Descaso zà impostôu
Cö scciêuppo chi s’affïa
Per ben piggiâ l’ammïa
A-o Falchetto chi sghêuava,
O l’ëa li ch’o scrucciava,
Presto a gh’addentò un dïo
De pê, ch’ o bûttò ûn crïo
Sbraggiando tanto forte,
Che o Falchetto ö sentì,
E giandose ö scrovì,
Coscì o scappò dä morte.
