Piaggio M. - Poesie 1846/Esopo Zeneize/O Leon e o Ratto

Da Wikivivàgna
Sâta a-a navegaçión Sâta a-a çèrchia
Esopo Zeneize de Martin Piaggio
O Leon e o Ratto
[p. 64 modifica]

FOA XXXV.


O LEON E O RATTO.


In questo mondo, amixi,
Bezêugna fâ do ben
Finn-a a-i nostri nemixi,
Perchè ben spesso avven
Che o grande, e chi pêu spende
Da chi è piccin dipende,
E o forte, e o coraggioso
Da-o debole e spuïoso,
E ve ne convinçiö
Co-e föe che ve contiö.

Scappava ûn giorno ûn Ratto
Perseguitôu da ûn Gatto,
Corrindo in strambælon,
E tanto o camminò,
Meschin! che o se trovò
Sotto e sampe do Leon,

[p. 65 modifica]

Che in cangio d'ammassâlo,
Con affabilitæ
O se misse a leccâlo,
E o ghe dè a libertæ.

O Ratto o l’andò via
Tûtto pin d’allegria,
Nè mai o se scordò
A generosa azion
Ch’o riçevè da-o Leon.

E ûn giorno ch’o passò
A caxo da ûn boschetto,
O vedde là accoegôu,
E tatto ingarbûggiôu
O Leon in t’ûn sorchetto,
Rûggindo a ciù no dî
Senza poeìne sciortî:

O s’accostò ciannin,
E con i so dentin
E maggie o roziggiò,
E o desse a libertæ
A-o Leon, ch’ö ringraziò
Con dî: Patti e paghæ.


Piaggio46-2.gif