Piaggio M. - Poesie 1846/Esopo Zeneize/L'Erboo d'Amandoa e l'Erboo de Figo
| ←O Pastô e o Cacciôu | Esopo Zeneize de L'Erboo d'Amandoa e l'Erboo de Figo |
O Moscon→ |
FOA XXVIII.
A-o spuntâ da Primmaveja,
Unn’Amandoa in t’ûn giardin
A l'ëa tûtta bella scioïa,
Gianca comme ûn armellin;
Con superbia a se vantava,
Mincionnando ûn Briggiassotto,
Perchè nûo do tûtto, appenn-a
O cacciava qualche brotto;
Ma ûnn-a nêutte fesse ûn freiddo
Coscì forte, che giassò,
E all’Amandoa tûtte a reo
E so scioette ghe crovò.
Passò a Stæ, vegnì l’Autûnno,
Bello vedde o Briggiassotto
Pin de fighe lagrimose
Co-a camixa e o collo rotto,
Chi se vorta ä so vexinn-a,
E ghe dixe con raxon:
Dove son tûtte e to scioette,
E to amandoe dove son?
Ah! per bacco! che a to gloria
Presto in fûmme a se n’andò,
Ti n’hæ manco ciù de fêuggie,
Vegni chì, che te croviö.
Non se deve mai vantâ
D’ëse ricco e ben vestïo,
Nè chi è poveo mincionnâ
Perchè tûtto ven da Dio:
Un chi è ricco anchêu, doman
O porrieiva porze a man.
