Piaggio M. - Poesie 1846/Esopo Zeneize/A Farfalla
| ←A Feliçitæ | Esopo Zeneize de A Farfalla |
O Rango, o Zembo e l' Orbo→ |
Ne-a stagion ciù deliziosa,
Quando i proeì son tûtti scioii,
E rallegra i Oxelletti
Co-i so belli barbacii,
Sciortì tûtta missa in galla
Dä so casa ûnn-a Farfalla:
Comme ûnn’Iride vestïa,
D’oü e argento recammâ,
De rûbin, toppassi e zàffiri,
E de perle tempestâ,
Ciù che ûn lûmme a risplendeiva
Innamoando chi a veddeiva;
E pe-o primmo ghe va attorno
Rondezzando ûn Zeffiretto,
Che s’accosta adaxo adaxo
Vergognoso e lascivetto ,
O ghe dixe.... o ghe sospïa!....
Quella a passa, e a non l’ammïa;
Sempre ciù sûperba e bella,
Quanto ciù a camminn-a avanti,
Da ogni canto a trêuva sempre
Nêuvi amanti spaximanti
Baichi, Livii, Prûscianetti,
Giäsemin, Ganêufanetti;
Tûtti a ciamman, tûtti a vêuan,
Chi a tentava con l’odô,
Chi fa pompa da gianchessa,
Chi do rosso da so sciô;
Tûtti insomma van de balla
Pe innamoâ quella Farfalla;
Ma l’ëa tûtto tempo perso,
Chè orgogliosa e non cûrante
A l’andava errando sempre
De lê stessa solo amante,
Se non che d’intanto intanto
A i ammiava tanto quanto;
E poi giandoghe d’intorno,
Con fâ pompa de decöu,
Se fermava maliziosa
Per mostrâ l’argento e l'öu,
E de véddili soffrî
A gödiva a ciù no dî.
Giandonnando tûtto o giorno,
Ingannando questo e quello
Con de smorfie e de lûxinghe,
Passò o tempo, e in to ciù bello
Ammortò Apollo a candeja,
Se fè nêutte, e bonn-a seja!
Restâ sola in stradda a-o scûo
Senza aveì posciûo trovâ
Un chi fosse de lê degno,
S’incomença a desgûstâ....
Tûtt’assemme a scrêuve ûn lûmme
Da lontan tramezo a-o fûmme:
Innamoâ do poco cæo
Che brillava in tanto scûo,
Quello (a dixe) o l’è l’amante
Chi m’aspëta de segûo....
Addio, Zeffiri, addio, Scioî,
Che o me piaxe ciù che voî:
E piggiando ûn forte sghêuo
Verso o lûmme a s’incaminn-a :
No gh’andâ, farfalla! fermite!
Ti væ incontro ä to rovinn-a!....
A sentî sta voxe a-o coêu,
Ma dâ mente a no ghe vêu;
Sempre ciù a va incontro a-o cæo,
A l’è zà vixinn-a a-o lûmme....
A s’accosta... a o tocca... o a strinn-a!
E ghe brûxa e belle ciûmme!....
A vorrieiva scappâ via,
Ma a vacilla.... a cazze.... a spïa!!
Donne belle, Donne brûtte
Da majâse, oppù majæ,
Questa Foetta a l’è per tûtte,
Mai sedûe no ve lasciæ
Da ûn splendô chi ve pâ vëo,
Ma o l'è fäso e lûxinghëo.