 |
Questa pagina a no l'è stæta corretta. | |
No me l’ho mai ciû scordâ
Questa bella conclûxion,
Coscì a vêuggio anchêu stampâ
A serviâ d’introdûzion,
E per Prologo a-e mæ Foette:
Permetteime che ghe a mette,
Che a propoxito a me pâ ,
Coscì e vaddo a prinçipiâ.
Ne-a stagion ciù deliziosa,
Quando i proeì son tûtti scioii,
E rallegra i Oxelletti
Co-i so belli barbacii,
Sciortì tûtta missa in galla
Dä so casa ûnn-a Farfalla:
Comme ûnn’Iride vestïa,
D’oü e argento recammâ,
De rûbin, toppassi e zàffiri,
E de perle tempestâ,
Ciù che ûn lûmme a risplendeiva
Innamoando chi a veddeiva;
E pe-o primmo ghe va attorno
Rondezzando ûn Zeffiretto,
Che s’accosta adaxo adaxo
Vergognoso e lascivetto ,
O ghe dixe.... o ghe sospïa!....
Quella a passa, e a non l’ammïa;
